Nis ‘Takimi i Paqes’, lexohet letra e Papa Françeskut për Shqipërinë
Ka nisur në Tiranë takimi i 28 ndërkombëtar për bashkëjetesën fetare, i cili do të vazhdojë edhe në datat 7 dhe 8 shtator.
Në këtë takim u lexua edhe një letër e shkruar nga Papa Françesku, në të cilën Ati i Shenjtë shpjegoi edhe një herë se arsyeja e vizitës së tij vitin e kaluar në Shqipëri ishte për shkak të bashkëjetesës në vendin tonë. Më tej në letrën e Papa Françesku, i bëhej thirrje të gjithëve për të mos qëndruar indiferent ndaj krizës së emigrantëve, që janë larguar nga vendi i tyre për shkak të luftës.
“Nuk duhet të qëndrojmë indiferent para atyre që vuajnë nga dhuna dhe lufta. Por dhunë është edhe kur ngre mure dhe pengesa për atë që kërkon një vend paqeje. Dhunë është edhe kur zmbraps atë që largohet nga kushtet çnjerëzore për të kërkuar paqe”, thuhej ndër të tjera në letrën e Atit të Shenjtë.
Në këtë takim për paqe foli edhe Kryeministri Rama, i cili e cilësoi këtë nismë një ekologji e shpirtit të arsyes.
