Kryeministri i Shqipërisë, Edi Rama lajmëron se për pak orë nis fushata e vaksinimit ndaj COVID-19.
Rama thotë se tashmë lufta ndaj virusit ka hyrë në fazën e ofensivës së madhe për largimin e tij përfundimtar nga jeta jonë.
Vaksinimi në Shqipëri do të fillojë më shpejt se çfarë ishte parashikuar, teksa të parët që do marrin prodhimin e Pfizer/BioNTech janë mjekët, më pas të moshuarit.
Shqipëria ka marrë dozat e para, të cilat janë në masën 10 mijë e 750, disa prej të cilave do i jepen Kosovës. Vaksina në Shqipëri është falas dhe jo e detyrueshme, teksa momentalisht qendra e parë e vaksinimit është hapur në stadiumin ‘’Air Albania’’.
“MIRËMËNGJES 😊
dhe pak orë nga nisja e fushatës së vaksinimit #ShqipëriaBuzëqesh🌼 duke ju marrë pak minuta nga koha juaj, për të hedhur vështrimin pas në orët, minutat, ditët, javët e muajt e jashtëzakonshëm të luftës me Armikun e Padukshëm, e cila sot hyn në fazën e ofensivës së madhe për largimin e tij përfundimtar nga jeta jonë, ju uroj një javë të mbarë😍“,shkruan Rama.
Procesi i vaksinimit kundër koronavirusit në Shqipëri pritej që të niste javën e fundit të muajit janar, por kryeministri Edi Rama njoftoi dje papritur afrimin e afateve; Vaksinimi nis sot.
Dhe padyshim që ky është një lajm i mirë, pasi vaksina shihet si e vetmja mënyrë për t’i dhënë fund pandemisë.
Gjithsesi ka ende shumë të panjohura, por ka disa detaje që tashmë janë bere te ditura për publikun.
Së pari, vaksinimi do të bëhen në stadiumin “Air Albania”. Në të gjithë stadiumin janë 60 bokse, aktualisht janë 20 gati. Për një orë qarkullojnë gati 60 individë, ndërsa do të punohet për 8-10 orë në ditë. Pas marrjes së dozës qytetari duhet të qëndrojë rreth 30 minuta më pas largohet.
Së dyti, ashtu si në të gjithë botën, vaksinimi do të nisë me mjekët, të cilët janë në vijën e parë të rrezikut me sëmundjen, më pas do t’u injektohet doza mësuesve, efektivëve të policisë në terren dhe moshave mbi 75-vjeç. Vaksina do të jetë falas por jo e detyrueshme
Së treti, dihet që Shqipëria, deri tani, ka siguruar 500 mijë doza të vaksinës antiCovid nga kompania Pfizer.
Mësohet se 10750 dozat e para të kësaj vaksine, sipas kontratës, do mbërrijnë në Shqipëri në fillim të javës së tretë të janarit. 30250 doza të tjera do vijnë në shkurt dhe të tjerat me radhë muaj pas muaj në bazë të planit të vaksinimit.
Aktualisht vendi ynë është në diskutime edhe me kompani të tjera.
Së katërti, është mësuar edhe se ku do të ruhet vaksina. Sipas Eugena Tominit janë siguruar për rreth 30 mijë doza frigoriferët mbi -70 gradë.
g.kosovari
