Ka nisur këtë të hënë (14 prill) shpërndarja e fletëve të para të votimit për shqiptarët që jetojnë jashtë vendit dhe janë regjistruar për të marrë pjesë në zgjedhjet parlamentare të 11 majit. Për herë të parë, diaspora do të ketë mundësinë të ushtrojë të drejtën e votës nga jashtë kufijve të Shqipërisë.
Fletët e para të votimit janë dërguar për votuesit e qarkut Dibër dhe të Beratit. Çdo votues i regjistruar do të marrë një zarf që përmban fletën e votimit, një zarf të brendshëm për kthimin e votës dhe udhëzuesin për mënyrën e saktë të plotësimit të saj, me qëllim që vota të jetë e vlefshme.
Votuesit në diasporë kanë kohë ta plotësojnë dhe ta dërgojnë fletën e votimit me postë deri në javën e parë të muajit maj. Çdo votë që mbërrin në Shqipëri pas datës 11 maj, ora 19:00, do të konsiderohet e pavlefshme.
Pallati i Sportit “Feti Borova”, pranë Parkut Olimpik të Tiranës, është vendi i caktuar për administrimin e këtij procesi, ku po përgatiten dhe dërgohen fletët e votimit, si dhe ku do të kryhet numërimi i votave të diasporës.
Por si do të votojnë emigrantët?
Zarfi do të shkojë në shtëpitë apo adresat e deklaruara të qytetarëve shqiptarë të cilët jetojnë jashtë vendit dhe do të ushtrojnë të drejtën e votës në zgjedhjet parlamentare të 11 majit.
Zarfi B është zarfi i parë i cila ka një barkod që përmban shtetin ku ndodhet emigrant që do të ushtrojë të drejtën e votës dhe qarkun se ku do të numërohet vota.
Në brendësi të zarfit B qëndron zarfi A, njëkohësisht edhe një udhëzues i cili ju tregon të gjithë qytetarëve mënyrës se si vota e tyre të jetë e vlefshme.
KQZ këshillon të gjithë qytetarët që as në zarfin B as atë A, i cili përmban fletën e votimit, të mos lënë asnjë shënim pasi në këtë mënyrë vota e tyre do të jetë e pavlefshme.
Brenda zarfit A qëndron fleta e votimit, aty ku të gjithë qytetarët që jetojnë jashtë vendit do të mund te ushtrojnë të drejtën e votës.
Që vota e tyre të jetë e vlefshme, në rastin më të mirë do të duhet të votojë partinë ose koalicionin që dëshiron dhe nga ana tjetër, në listë të hapur të votojë kandidatin i cili i përket këtij koalicioni apo këtij subjekti politik.
Në raste të tjera kur vota sërish mund të konsiderohet e vlefshme është kur qytetari voton vetëm partinë apo koalicionin që dëshiron dhe nuk ka një kandidat të preferuar.
Një tjetër mundësi që vota të jetë e vlefshme është votimi i vetëm të kandidatit të preferuar.
