82-vjeçari Bryan Pinker është i pari britanik të cilit i injektohet vaksina e firmës Astra Zeneca që këtë të Hënë nisi të përdoret për vaksinimin e kategorisë më të rrezikuar nga koronavirusi. Ai i nënshtrohet periodikisht dializës pasi vuan nga veshkat.
Autoritetet britanike miratuan kërkesën e kësaj firme për përdorim urgjent të produktit të tyre për vaksinim, më 30 Dhjetor të vitit të kaluar. Kjo është e dyta vaksinë e cila nis injektimin në këtë vend, pas asaj të firmave Pfizer BioNTech. Vaksina e Astra Zeneca-s e zhvilluar në bashkëpunim me shkencëtarët e Oksfordit konsiderohet si produkti i parë anti-Covid i zhvilluar në Britaninë e Madhe.
Deri tani janë porositur nga qeveria britanike 100 milionë doza të mjaftueshme për vaksinimin e 50 milionë njerëzve. Aleanca globale COVAX ku bën pjesë edhe Shqipëria ka një marrëveshje paraprake për furnizimin me doza të mjaftueshme nga Astra Zeneca.
Avantazhi i vaksinës Astra Zeneca është çmimi rreth 3 dollarë për dozë, të paktën 7 herë më i lirë se dozat e Pfizerit dhe Modernës. Ruhet në temperatura frigoriferike normale nga minus 75 e minus 25 gradë Celcius të nevojshme për vaksinat e dy firmave të tjera.
Shkencëtarët e Oksfordit përdorin një variant të dobësuar të viruseve të ftohjes të majmunëve për të vënë në gatishmëri sistemin imunitar të njeriut kundër Covid-it. Ndërsa vaksinat e firmave Pfizer dhe Moderna përdorin metodologjinë e papërdorur më parë të ARN-së së modifikuar të vetë koronavirusit për të njëjtën gjë. Se cila mënyrë do të rezultojë më efektive, kjo mbetet për t’u parë por sipas testeve të deritanishme vaksina e Astra Zeneca-s dhe Oksfordit ka efektshmëri më të ulët.
/a.r
