Pas qetësimit të situatës ka nisur tashmë në Turqi “gjuetia e shtrigave” e cila ka nisur fillimisht me ushtarakët, rreth 3 mijë prej tyre, e më pas drejt gjyqtarëve.
Deri më tani janë lëshuar rreth 200 fletëarreste për gjyqtarë të niveleve të ndryshme, përfshi edhe ata të Gjykatës së Lartë dhe Këshillit të Lartë të Gjyqtarëve e Prokurorëve. Janë arrestuar prej tyre 11 gjykatës të Lartë dhe 4 anëtarë të Këshillit.
Akuza është anëtarësim në organizatë terroriste. Kryeprokuroria e Ankarasë mori vendim për arrestimin e 140 anëtarëve të Gjykatës së Lartë, 48 anëtarëve të Kontrollit të Lartë të Shtetit si dhe për katër anëtarë të Këshillit të Lartë të Gjyqtarëve dhe Prokurorëve.
Fillimisht janë arrestuar anëtarët e Kontrolli të Lartë të Shtetit dhe më pas 11 anëtarët e Gjykatës së Lartë si dhe katër anëtarët e Këshillit të Lartë të Gjyqtarëve dhe Prokurorëve.
Nga detyra janë pushuar në total në rang vendi rreth 3 mijë gjyqtarë, me argumentin se kishin lidhje me puçistët dhe Gulen, “armikun” kryesor të Erdogan si dhe personin të cilit qeveria e kryesuar prej tij akuzon, se fshihet pas puçit.
Në sektorin e ushtrisë, deri më tani janë arrestuar 3 mijë “puçistë”. Madje disa prej tyre, kur janë pyetur nga hetuesit, janë shprehur se nuk ishin në dijeni të grushtit të shtetit, pasi komandantët i kishin thënë se bëhej fjalë vetëm për një stërvitje.
Dy personat të cilëve u lakohet emri nga mediat turke si përgjegjëesit për grushtin e shtetit janë gjeneral lejtnant Metin Iyidil, komandant për Ushtrime Luftarake dhe Mbështetje i Forcave Tokësore dhe të Komandës së Doktrinës,
si dhe ish-komandanti i i Forcave Ajrore të Turqisë, Akin Ozturk. Media turke Hyrriet, shkruan se ish komandanti i forcave ajrore do të gjykohet për tradhëti kombëtare.
Në fjalën e tij, Kryeministri turk Yildirim tha se pjesëtarët e çetave paralele në shtetin turk tashmë ndodhen në duart e drejtësisë.
“Pjesëtarët e çetave paralele tashmë ndodhen në duart e drejtësisë së Turqisë. Ata do të marrin dënimin më të rëndë të merituar. Populli jonë ka treguar një mendjemprehtësi dhe kjo mendjemprehtësi bëri që të ruhet vullneti kombëtar. Ata të cilët organizuan këtë kryengritje duhet të dinë edhe njëherë; askush nuk mund të luaj me vullnetin e këtij populli të madh. Kthimi në jetën normale sot është një shenjë e virtytit të qytetarëve tanë. Ata që kanë hapur zjarr me armët, paratë, tanket, bombat, avionët, helikopterët e shtetit kundër qytetarëve të këtij vendi janë një organizatë terroriste më e ulët se terrorizmi i PKK-së. Ky popull kurrë dhe kurrë nuk do ta harrojnë këtë bandë tradhtare. Disa miq tanë kishin vështirësi të kuptonin ndjeshmërinë që ne kemi treguar që në fillim, por kjo periudhë që ata arritën të kuptojnë na ka kushtuar një kosto të madhe“, u shpreh Yıldırım./java/a.k
