Partitë politike në Kosovë, të shtunën nisën fushatën zgjedhore për parlamentaret e 9 shkurtit.
Kryeministri aktual, Albin Kurti kërkoi edhe një mandat të dytë siç tha ai të siguruar me 500 mijë vota.
Në tubimin e parë të fushatës që e nisi në Gjakovë, Kurti sulmoi kundërshtarët politikë, duke thënë që në vend janë dy parti që kanë keqqeverisur.
“Njëra prej këtyre partive, LDK-ja, është e tillë që presidentit të Serbisë i thotë ‘Razumem’, e partia tjetër PDK-ja është e tillë që presidentit të Serbisë i thotë ‘We are not problematic guys’. Por, koalicioni jonë Vetëvendosje!, Guxo dhe Alternativa i thotë atij ashtu siç është ministër i Millosheviqit”, thotë Kurti
Kryeministri aktual premtoi edhe më shumë investime në sektorë të ndryshëm krahas mbështetjes për shqiptarët e Luginës së Preshevës.
Ndërkohë, zhvillimi ekonomik, rritja e pagave dhe mirëqenia e qytetarëve të Kosovës qenë premtimet në ditën e parë të fushatës nga Bedri Hamza, kandidatit për kryeministër i Partisë Demokratike të Kosovës.
Bedri Hamza, kandidat për kryeministër i Partia Demokratike e Kosovës tha: “Vizioni im për një Kosovë më të fuqishme ka në themel hapjen e vendeve të reja të punës, ka edhe rritjen e pagave në sektorin privat përmes rritjes së mbështetjes për biznese”.
Me ndryshimin si mision, Lidhja Demokratike e Kosovës e hapi fushatën zgjedhore. Kandidati për kryeministër nga kjo parti, Lumir Abdixhiku nuk u rezervua në kritikat për qeverisjen në shkruaje.
Kandidat për kryeministër i Lidhja Demokratike e Kosovës, Lumir Abdixhiku u shpreh: “Le tu themi qartë, le tu themi thjeshtë, le tu themi zëshëm nga kjo sallë, nëpër çdo cep të Kosovës, le tu themi cep më cep, paratë e vjedhura do t’i ktheni cent më cent”.
Koalicioni AAK-NISMA ditë e parë të fushatës e nisi me homazhe pranë varrezave të familjes Jashari në Prekaz të Skenderajt.
Kandidati për kryeministër nga Koalicioni për Kosovën Fituese, Ramush Haradinaj u shpreh se pikënisja për çdo gjë është Prekazi.
“Prekazi është betimi ynë për shtet e atdhe, për liri e për demokraci, prej këtu nisemi drejt parlamentit të Kosovës”, tha Haradinaj.
Zgjedhjet parlamentare në Kosovë do të mbahen më 9 shkurt.
