Një kamp që duhej të ishte strehë nga terrorizmi dhe dhuna u shndërrua në një zonë vdekje për dhjetëra njerëz në Nigeri. Të paktën 58 persona u vranë dhe mbi 80 të tjerë u plagosën kur dy kamikaze femra hodhën veten në erë në mes të kampit.
Viktimat ishin në një kamp për njerëzit e dëbuar apo të larguar nga dhuna e Boko Haram në provicën Borno në Nigeri. Mediat lokale thanë se masakra mund të kishte qenë më e frikshme, nëse një prej kamikazëve nuk do të ishte tërhequr.
Mësohet se tre femra të veshura me jelekë eksplozivë hynë në kamp dhe dy prej tyre hodhën vetën në erë duke vrarë me dhjetëra. Kamikazja e tretë nuk pranoi që ta kryente sulmin vetëm sepse mori vesh që familja e saj ishte në atë kamp.
“Ajo tha se ishte e frikësuar sepse e dinte që do të vriste njerëz, por gjithashtu frikësohej nga njeriu që i dha instruksionet dhe e solli në kamp. Ajo e dinte gjithashtu se i ati ishte në atë kamp dhe nuk dëshironte ta vriste. Ajo na tha se kishte tentuar të bindte edhe dy vajzat e tjera të braktisnin misionin, por nuk kishte arritur t’ua ndryshonte mendjen”, deklaroi Modu Awami, një ushtare e mbrojtjes që kishte marrë në pyetje kamikazen e tretë.
Pasi u dorëzua tek forcat e sigurisë, ajo tregoi se bashkë me dy kamikazet e tjerë ishte dërguar nga organizata terroriste Boko Haram për të sulmuar kampin në qytetin Dikua.
Autoritetet nigeriane thanë se e dyshuara tregoi se Boko Haram ka planifikuar sulme të tjera dhe kamikazë të shumtë janë gati ose janë nisur në misionet e tyre vetëvrasëse.
Policia nigerinae tha se tre kamikazet u infiltruan në kamp duke u shtirur sikur po i largoheshin luftës dhe për këtë arsye Boko Haram përdor femra, pasi për to është më e lehtë që të kalojnë kontrollet e sigurisë.
