Tirana festoi sot, ashtu si edhe gjithë Shqipëria, festën e ngritjes së Flamurit Kombëtar dhe shpalljes së Pavarësisë, 105 vite më parë nga Ismail Qemali e shumë patriot të tjerë në Vlorë. Por festimet e këtij viti u shoqëruan me dy risi: së pari ceremonia e ngritjes së flamurit në Tiranë për herë të parë u zhvillua në Sheshin e ri Skëndërbej dhe së dyti, Himni ynë Kkombëtar u ekzekutua në një mënyrë të veçantë.
Bashkia e Tiranës ishte kujdesur që ai të vinte ndryshe këtë vit, i ekzekutuar jo nga Banda Frymore e Tiranës siç jemi mësuar ta shohim në çdo ceremoni të ngjashme, por nga afro 100 kitaristë. Është vet kryetari i Bashkisë së Tiranës, Erion Veliaj, ai që vë në dukje faktin se falë këtyre artistëve të rinj Himni kësaj here erdhi më modern se herët e tjera.
“Himni unik sivjet! Falë 100 artistëve të talentuar të Akademia Hollywood, “Rreth Flamurit të Përbashkuar” tingëlloi me ROCK se kurrë! FALEMNDERIT! Rinia jone më mbush me shpresë se 105 vitet e ardhshme do jenë më të mirat për Shqipërinë tonë!”, shkruan kryetari i Bashkisë së Tiranës, Erion Veliaj në twitter, ndërsa ka publikuar dhe disa foto nga kitaristët që u bënë pjesë e kësaj ceremonie në Sheshin Skëndërbej. /a.ç
