Spartak Ngjela thotë se reforma në drejtësi duhet të jetë radikale. Ai shprehet se duhet të rrafshohet gjithçka dhe duhet të largohen gjithë gjyqtarët aktualë.
“Reforma jonë në Drejtësi duhet të jetë një ‘smasher of everything’ (rrafshues i gjithçkaje)”, u shpreh Ngjela në kuadër të platformës së tij për reformën në drejtësi “ACCESS TO JUSTICE”, të cilën e prezantoi një ditë më parë.
Ngjela propozon shkrirjen e gjykatave të të tri shkallëve, Gjykatën e Lartë, të gjitha gjykatat e Apelit, të gjitha gjykatat e Shkallës së Parë, si dhe shkarkimin e të gjithë gjyqtarëve të të të gjitha shkallëve. Sipas tij, për të ndryshuar kjo gjendje “është e domosdoshme që, së pari, duhet të ndërtohet sistemi politik i pakorruptuar, i cili, me maxhorancën parlamentare, të fillojë radikalisht filtrimin e sistemit legal, e sidomos filtrimin e Pushtetit Gjyqësor. Ndryshimi drastik i ligjeve dhe reformimi i pushtetit legal do ta sjellë pa dyshim gjendjen reale ligjore të vetë sistemit legal dhe do të ndërtojë një gjykatë të pavarur që jep drejtësi. Kur të jetë arritur kjo, nuk do të ketë më rrezik që qeverisja të vijojë rrugën e vet të abuzimit dhe të korrupsionit”.
