Analisti Roland Bejko, i ftuar në emisionin “Real Story” në ABC News, komentoi ndryshimet e propozuara në Kodin e Procedurës Penale.
Bejko i cilësoi këto ndryshime si pjesë të një përplasjeje mes pushteteve, duke ngritur shqetësimin për përfshirjen e grupeve të interesit në procesin e hartimit të tyre.
Ai theksoi se reforma në drejtësi ka nevojë për rregullime, por sipas tij ato duhet të diskutohen me prokurorët, avokatët dhe aktorët e tjerë të sistemit. Në veçanti, Bejko u ndal te raporti i ri mes SPAK, GJKKO dhe pjesës tjetër të sistemit të drejtësisë.
“Është një luftë pushtetesh. Kërkojnë që të ruajnë në maksimum lehtësirat e punës së vet. Ajo q ëmë shqetëson mua në gjithë këtë situatë është se si ndryshon një ligj, si bëhet një ndërhyrje, jo të gjithmonë përfshihen grupet e interesit. Prokurorët thonë që nuk janë pyetur, po ashtu as avokatët.
Në këtë sens grupet e interesit duhen pyetur. Gjithçka që vjen nga rrahja e mendimit, provojnë gjëra të mira. Reforma në drejtësi ka që në vitin 2016 është që miratuar dhe këto probleme kanë qenë me vite me radhë. A ka nevojë që të bëhen rregullime? Patjetër që ka nevojë.
Kjo është bërë për të ndërtuar një raport të ri kryesisht me SPAK, pastaj me GJKKO, pastaj me pjesën tjetër të shoqërisë. Ajo që mund të prishë është, që SPAK me të gjitha këto që po bëhen është që t’i hiqet ajo special dhe të ngelë vetëm prokurori”, tha Bejko.
