Dy vëllezërit Klajdi dhe Aldo Kodra, 26 dhe 20 vjeç, janë shpallur në kërkim nga Policia e Tiranës për ngjarjen e ndodhur mbrëmjen e së mërkurës në zonë e Komunës së Parisit, pranë një qendrës Kristal.
Ata kanë plagosur me sende të forta 39–vjeçarin Flamur Cullhaj dhe më pas kanë qëlluar njëherë në ajër, gjatë momentit të largimit.
Ngjarja ndodhi rreth orës 21:05, ku dy vëllezërit që lëviznin me një mjet BMW ngjyrë të zezë, fillimisht janë konfliktuar fizikisht në rrethana ende të paqarta me Flamur Cullhaj, të cilin e kanë goditur disa herë, duke i shkaktuar plagë në fytyrë dhe në pjesën e shpinës dhe më pas janë larguar.
Kanë qenë banorët e zonës, që të terrorizuar pas të shtënës me automatik, kanë njoftuar policinë.
Cullhaj u gjet i plagosur në banesën e tij. Fillimisht u dyshua se ishte plagosur me armë zjarri, por pas konsultimit me mjekët e Spitalit të Traumës, rezultoi se ishte dëmtuar me sende të forta.
Në vendngjarje efektivët e kryeqytetit gjetën një gëzhojë, 7.65 mm., ndërsa po punohet për zbardhjen e plotë të ngjarjes.
Tv Klan/d.i.
