Tensioni ndërmjet Kosovës dhe Maqedonisë shtohet dita-ditës, kjo pas ngjarjes së Kumanovës. Siç bëjnë të ditura mediat kosovare, qeveria e Kosovës i ka dorëzuar një notë proteste ambasadës së Maqedonisë në Prishtinë, në lidhje me shqetësimin e mungesës së informacionit nga autoritetet maqedonase për përfshirjen e shtetasve të Kosovës në incidentin në Kumanovë
Sipas mediave kosovare, autoritetet e Prishitnës menjëherë pas ngjarjeve në Kumanovë kanë themeluar edhe një komision ndër-institucional për t’i përcjellë zhvillimet në Maqedoni, i cili ka adresuar edhe zyrtarisht shqetësimin për mungesën e informacionit për përfshirjen e shtetasve të Kosovës në aksionin policor në Kumanovë ku mbetën të vrarë 22 persona.
“Ministria e Punëve të Jashtme ka dërguar edhe një notë verbale tek Ambasada e Republikës së Maqedonisë, me të cilën ka kërkuar sqarime për fatin e shtetasve kosovarë. Prokuroria dhe hetuesia mjeko-ligjore janë mobilizuar dhe janë përgatitur të verifikojnë gjendjen shëndetësore të të ndaluarve, por edhe që të bëjnë obduksionin e viktimave eventuale”, shprehen mediat kosovare.
