Situata e acaruar politike në vend, kur kanë mbetur më pak se dy muaj kohë deri në ditën e votimit, dëmton cilësinë e zgjedhjeve dhe të përfaqësimit në to.
Në një situatë normale parazgjedhore, partitë politike duhet të ishin përfshirë në ballafaqime të hapura me zgjedhësit për realizimin e programit qeverisës sa i takon maxhorancës dhe alternativës për ardhjen në pushtet për opozitën. Por në fakt, sot vendi rrezikon të shkojë në zgjedhje pa opozitën, duke i bërë ato lehtësisht të kontestueshme dhe rezultatin të papranueshëm.
Në këtë situatë të rënduar si rrallë ndonjëherë para zgjedhjeve parlamentare, partitë duhet të kujdesen dhe për zbatimin e Kodit Zgjedhor sa i takon kuotës gjinore me 30% në listat e tyre për deputetë të Kuvendit të ri të Shqipërisë.
OSBE-ODIHR-i në rekomandimet përfundimtare pas zgjedhjeve të fundit parlamentare, qershor 2013, kërkoi rregullime në Kodin Zgjedhor të Republikës së Shqipërisë për një përfaqësim sa më real të grave në listat e kandidatëve për deputetë.
“Vëmendje duhet t’i kushtohet promovimit të mëtejshëm të kandidateve gra…Gjithashtu, Kodi Zgjedhor mund të ndryshohet për të parashikuar pozicionim më të ekuilibruar dhe të qëndrueshëm të kandidateve gra në listat e partive politike”, thuhet në rekomandimin 17 të raportit përfundimtar të OSBE-ODIHR-it për zgjedhjet e vitit 2013.
Në pikën 5 të nenit 67 të Kodit Zgjedhor, theksohet se: “…për çdo zonë zgjedhore, të paktën tridhjetë për qind e listës shumëemerore dhe/ose një në tre emrat e parë të listës shumemërore duhet t’i përkasë secilës gjini”.
Komisioni i posaçëm parlamentar për reformën zgjedhore nuk arriti të bëjë asnjë përmirësim të Kodit Zgjedhor edhe pse mandati i tij është shtyrë nga parlamenti disa herë. Në këtë situatë duket se alternativa e vetme është që partitë politike të mbajnë premtimet e tyre publike mbi përfaqësimin e barabartë. Por situata aktuale duket se po e largon vëmendjen nga shumë çështje më rëndësi në një vit elektoral, siç është edhe premtimi për barazi të plotë në listat e kandidatëve për deputetë të bërë nga partitë kryesore parlamentare./Panorama/a.m.
