Franca, Gjermania, Britania e Madhe dhe Italia kanë dënuar planet e Izraelit për hapjen e tenderëve për ndërtimin e një projekti të madh banimi për kolonët izraelitë në Bregun Perëndimor, të njohur si “E1”.
Në një deklaratë të përbashkët, katër vendet thanë se ky vendim është veçanërisht shqetësues, duke pasur parasysh situatën e rëndë në Bregun Perëndimor, dhunën e paprecedentë të kolonëve ndaj civilëve dhe kufizimet e mëdha ndaj ekonomisë palestineze.
“Ne i bëjmë thirrje qeverisë së Izraelit t’i tërheqë menjëherë këto plane dhe t’i japë fund zgjerimit të vendbanimeve në Bregun Perëndimor”, thuhet në deklaratë.
Katër shtetet paralajmëruan gjithashtu kompanitë që të mos marrin pjesë në tenderë, pasi mund të përfshihen në veprime që përbëjnë shkelje të rënda të së drejtës ndërkombëtare.
Izraeli ka pushtuar Bregun Perëndimor që nga lufta e vitit 1967. Qindra mijëra izraelitë janë vendosur atje, mes miliona palestinezëve. Vendbanimet izraelite në territorin e pushtuar konsiderohen të paligjshme sipas së drejtës ndërkombëtare.
Projekti “E1” shtrihet në një sipërfaqe prej rreth 12 kilometrash katrorë, në lindje të Jeruzalemit. Plani parashikon ndërtimin e rreth 3 400 banesave, në një zonë që ndodhet mes Jeruzalemit dhe vendbanimit izraelit Maale Adumim.
Projekti është veçanërisht i ndjeshëm, pasi mund të ndajë Jeruzalemin Lindor nga pjesa tjetër e Bregut Perëndimor. Sekretari i Përgjithshëm i OKB-së e kishte cilësuar më herët projektin “E1” si një “kërcënim ekzistencial” për krijimin e një shteti palestinez të vazhdueshëm territorial.
Sipas organizatës izraelite “Peace Now”, tenderi i fundit përfshin më shumë se 1 200 banesa. Ministria izraelite e Strehimit e publikoi tenderin më 18 gusht dhe menjëherë hapi procesin për ofertat.
Kompanitë kanë afat deri më 19 tetor për të paraqitur ofertat, vetëm një javë para zgjedhjeve në Izrael, të planifikuara për 27 tetor.
“Peace Now” thotë se banesat e përfshira në tender përbëjnë rreth një të tretën e projektit të planifikuar “E1”. Organizata akuzon qeverinë izraelite se po përpiqet të avancojë projektin dhe të krijojë detyrime për ndërtimin e tij para zgjedhjeve.
Ndërkohë, palestinezët në Bregun Perëndimor përballen me kufizime të mëdha në lëvizje. Për të kaluar drejt Jeruzalemit Lindor ose Izraelit, ata duhet të pajisen me leje dhe të kalojnë nëpër pika kontrolli të administruara nga autoritetet izraelite.
