Detaje të reja po dalin në dritë mbi viktimat e sulmit të rëndë të armatosur në Bondi, Sydney, i cili tronditi Australinë dhe komunitetin ndërkombëtar.
Sipas The Guardian, mes 16 personave që humbën jetën janë të mbijetuar të Holokaustit, liderë fetarë, vullnetarë të përkushtuar dhe qytetarë që tentuan të ndalonin sulmin dhe të mbronin të tjerët.
Sulmi ndodhi të dielën, gjatë një aktiviteti për festimin e ditës së parë të Hanukah-ut. Autoritetet australiane e kanë cilësuar këtë si sulmin më të rëndë me armë zjarri në vend që nga masakra e Port Arthur në vitin 1996.
Bilanci paraprak flet për 16 viktima dhe 40 persona të plagosur. Deri të martën në mbrëmje, 22 persona, përfshirë dy efektivë policie, vijonin të trajtoheshin në spital. Policia ka bërë të ditur se viktimat ishin nga 10 deri në 87 vjeç.
Viktimat e identifikuar deri më tani
Matilda (10 vjeç) – Vajza e mitur u dërgua me urgjencë në spitalin e fëmijëve në Sydney, ku ndërroi jetë. Ish-nxënëse e shkollës “Harmony Russian School of Sydney”, ajo u përshkrua nga mësuesja e saj si një fëmijë plot dritë, gëzim dhe energji pozitive.
Peter Meagher (61 vjeç) – I njohur edhe si “Marzo”, Meagher ishte vullnetar prej vitesh në klubin e rugby-t Randwick. Ai po punonte si fotograf i pavarur në eventin “Chanukah By the Sea”, kur u vra. Klubi e përshkroi humbjen e tij si një tragjedi të pashpjegueshme.
Tibor Weitzen (78 vjeç) – Sipas nipit të tij, Tibor Weitzen humbi jetën duke mbrojtur një mik të familjes. Ai do të kujtohet si një njeri plot jetë, buzëqeshje dhe energji pozitive.
Rabini Eli Schlanger (41 vjeç) – Me origjinë nga Londra, babai i pesë fëmijëve dhe ndihmës në Chabad of Bondi, u përshkrua nga familjarët si një njeri energjik, i ngrohtë dhe gjithmonë i gatshëm për të ndihmuar të tjerët.
Alexander Kleytman (87 vjeç) – Vdekja e tij u konfirmua nga bashkëshortja, Larisa. Çifti, të mbijetuar të Holokaustit dhe emigrantë nga Ukraina, kishin ndërtuar jetën e tyre në Australi pas traumave të së kaluarës. Sipas dëshmive, Alexander u përpoq të mbronte bashkëshorten gjatë sulmit.
Dan Elkayam (27 vjeç ) – Shtetas francez, i cili jetonte prej vitesh në Australi. Vdekja e tij u nderua edhe nga presidenti francez Emmanuel Macron. Ai ishte i njohur si futbollist i talentuar dhe shumë i dashur nga shokët e ekipit.
Reuven Morrison (62 vjeç) – I njohur si Rueben, ai u identifikua nga e bija si personi që shihet në pamjet e shpërndara në rrjete sociale duke u përballur me sulmuesin. “Ai luftoi për të mbrojtur njerëzit që donte më shumë”, deklaroi ajo.
Rabini Yaakov Levitan (39vjeç) – Menaxher i përgjithshëm i Chabad of Bondi dhe sekretar i Sydney Beth Din. Me origjinë nga Afrika e Jugut, ai konsiderohej një shtyllë e rëndësishme e komunitetit hebre në Sydney.
Marika Pogany (82 vjeç) – E mbijetuar e Holokaustit dhe vullnetare e përkushtuar për gati tre dekada. Ajo kishte humbur pothuajse të gjithë familjen gjatë Luftës së Dytë Botërore dhe u nderua për kontributin e saj humanitar në Australi.
Boris Gurman (69 vjeç) dhe Sofia Gurman (61 vjeç) – Çifti rus-hebre jetonte në Bondi prej dekadash. Ata tentuan të ndalonin njërin nga sulmuesit në momentet e para të sulmit. Boris, mekanik në pension, dhe Sofia, punonjëse e Australia Post, u përshkruan nga familja e të afërm si njerëz të ndershëm, bujarë dhe thellësisht të përkushtuar ndaj komunitetit dhe njëri-tjetrit.
Hetimet për sulmin vijojnë, ndërsa Australia dhe komuniteti ndërkombëtar po shprehin solidaritet me familjet e viktimave.
Tragjedia e Bondi-t ka rihapur debatin mbi sigurinë publike dhe ekstremizmin, duke rikujtuar plagë të thella në historinë moderne të vendit.
