Ekspertët tregojnë se përse automjetet në Shqipëri dëmtohen shumë më shpejt. Një nga arsyet është cilësia e keqe e karburanteve, të cilat janë edhe ndër më të shtrenjtat. Nafta jo cilësore që shitet në Shqipëri është një nga arsyet e ndotjes së ajrit në qytetet e mëdha, por edhe të shkatërrimit të automjeteve. Altin Dorri, Shefi i Departamentit të Energjetikës në Universitetin Politeknik thotë se një naftë e keqe është ajo që ka papastërti kimike dhe mekanike duke e bërë të vështirë djegien e saj.
“Në qoftë se do të kemi papastërti mekanike do të bllokojë sistemin e qarkullimit të lëndës djegëse. Në qoftë se ka papastërti kimike ka përzierje të padëshiruar jo hidrokarbure, si sulfure ose lagështi në këtë rast uji do të ndikojë në korrodimin e tubacioneve të ushqimit, do të ndikojë tek cilësia e djegies duke prodhuar njëkohësisht dhe substanca të dëmshme. Pra do të bllokohen filtrat, do të bllokohen tubacionet, pompat që janë me ingranazhe”, u shpreh Altin Dorri.
Nafta shqiptare është pothuajse njësoj e shtrenjte me atë që shitet në Gjermani dhe Greqi dhe më e shtrenjtë se në Kosovë, të cilët kanë naftë më cilësore se Shqipëria. Këtë e dëshmojnë vetë emigrantët shqiptarë. Ne ju sjellim sot dëshmitë e disa prej tyre.
“Unë jetoj në Athinë nafta është 1.49 po të njëjtat çmime janë dhe në Shqipëri. I vetmi problem që më ndodh në Shqipëri është se sa herë e mbush makinë ajo më prishet dhe duhet ta rregulloj pastaj”, shprehet një emigrant që jeton në Athinë.
“Unë jam qytetar i Kosovës, çmimi i naftës është 1 euro e 18 cent dhe cilësia është shumë herë më e mirë sa në Shqipëri”, tregon një kosovar.
Këto dëshmi forcojnë atë që gjithë qytetarët shqiptar e dinë, por autoritetet nuk e dëgjojnë, që në tregun shqiptar shitet naftë shumë e shtrenjtë për shkak të taksave dhe më pak cilësore për shkak të tregtarëve. TCH
ma.me
