Nga ‘Sex and the City’ në qeverisjen e New York. Protagonistja e serialit të famshëm, Cynthia Nixon, ka njoftuar se do të kandidojë për postin e guvernatorit të këtij shteti.
Nixon planifikon të sfidojë guvernatorin aktual Andrew Cuomo për nominimin e Partisë Demokratike. Aktorja dhe aktivistja 51-vjeçare, e cila përflitej prej kohesh si kandidate e mundshme, i njoftoi planet përmes një postimi në Twitter të hënën.
“E dua New York-un dhe nuk kam dashur kurrë të jetoj diku tjetër, por diçka duhet të ndryshojë”, thotë Nixon në videon e fushatës, ku listoi disa prej prioriteteve, të tilla si shëndetësia, lufta ndaj burgosjeve masive etj.
Në serialin e suksesshëm të viteve 90-të dhe në dy përshtatjet kinematografike, Nixon ishte në rolin e një avokateje në karrierë. Ajo është vlerësuar më një çmim Emmy për performancën e saj.
Në atë kohë çmimin ia dorëzoi manjati i pasurive të patundshme Donald Trump, gjithashtu personazh i njohur i ekranit. Homoseksuale e deklaruar, Nixon u martua me bashkëshorten e saj Christine Marinoni në vitin 2012. Marinoni, aktiviste e LGBTQ ka punuar për kryebashkiakun demokrat të New York Bill De Blasio, deri muajin e kaluar kur dha dorëheqjen. Çifti kontribuoi financiarisht në garën e De Blasios për kryebashkiak.
a.ç
