Parisi e priti kështu vitin e ri 2025. Një valë fishekzjarrësh ndezën qiellin e kryeqytetit francez, për të gëzuar banorët e tij.
Një shfaqje verbuese u mbajt përpara monumentit të Harkut të Triumfit, në shëtitoren Champs Elysees.
Parisi e festoi largimin e 2024-s me një seri arritjesh si pritja e Lojërave Olimpike dhe rihapja e katedrales Notre Dame.
Edhe në Berlin ceremonia ishte madhështore. Disa mijëra spektatorë u mblodhën tek Porta e Brandenburgut për të ndjekur festimet.
Spektakli i fishekzjarrëve që zgjati disa minuta ngjyrosi qiellin e kryeqytetit gjerman, ndërsa të pranishmit shijuan momentin magjik.
Edhe në Romë u mbajt një event i ngjashëm. Mijëra njerëz u mblodhën jashtë Koloseut për të ndjekur ardhjen e Vitit të Ri.
Ceremonia më unike ishte në Athinë. Kryeqyteti helen zgjodhi një celebrim të heshtur pranë monumentit të Panteonit. Fishekzjarrë pa zhurmë, dronë dhe mjete të tjera piroteknike u përdorën.
Vendimi për një festim të heshtur ishte pjesë e një nisme që synonte të argëtonte spektatorët dhe të mos trembte kafshët dhe botën e egër.
Ndërrimi i viteve në Tbilisi dhe qytete të tjera të Gjeorgjisë u shënua nga një demonstrim i fuqishëm.
Në ditën e 34-t të manifestimeve, qytetarët mbushën sërish rrugët për të kërkuar zgjedhje të reja parlamentare dhe lirimin e personave të burgosur në ditët e mëparshme.
Duke ndërthurur festimin dhe aktivizimin, në shëtitoren kryesore të Tbilisit u mbajt ajo që njihet si Supra e Gjatë, një festë tradicionale gjeorgjiane.
Qytetarët e mbledhur deklaruan se ndërrimi i viteve nuk ishte vetëm një celebrim, por një akt sfide dhe rezistence.
Një numër protestuesish u mblodhën jashtë burgut Gldani, ku mbahen dhjetëra aktivistë të arrestuar.
Ndërsa në shëtitoren Rustaveli, përballë pemës së Krishtlindjes, manifestuesit paralajmëruan se protestat e tyre nuk kanë mbaruar.
