Kriza në industrinë automobilistike po i shtyn prodhuesit e mëdhenj të makinave drejt industrisë ushtarake. Pas lajmeve se Volkswagen po shqyrton prodhimin e pajisjeve për mbrojtjen ajrore, edhe gjiganti amerikan General Motors (GM) pritet të prodhojë pjesë për raketat e kompanisë Lockheed Martin.
Sipas raportimeve, GM dhe Lockheed Martin po negociojnë prodhimin e komponentëve për raketa precize dhe raketa interceptuese, të cilat SHBA-të i ka përdorur në sasi të mëdha në konfliktet në Ukrainë, Lindjen e Mesme dhe së fundmi në Iran.
Luftërat e viteve të fundit kanë treguar se kompanitë tradicionale të mbrojtjes nuk arrijnë të prodhojnë armë me ritmin e kërkuar. Për këtë arsye, Pentagoni kërkon të shfrytëzojë përvojën e industrisë së makinave, e cila ka kapacitete të mëdha prodhuese, teknologji moderne dhe rrjete të gjera furnizuesish.
Edhe pse fabrikat e automobilëve nuk do të prodhojnë raketa të plota, ato mund të ndërtojnë pjesë mekanike, struktura metalike dhe nënsisteme që përdoren në armët moderne.
Për General Motors, ky është edhe një rast për të kompensuar ngadalësimin e tregut të automobilëve dhe ritmin më të ulët se sa pritej të kalimit te makinat elektrike. Kompania ka tashmë një divizion ushtarak, GM Defense, ndërsa drejtuesja Mary Barra ka zhvilluar takime me administratën e presidentit Donald Trump për të rritur rolin e kompanisë në industrinë amerikane të mbrojtjes.
General Motors nuk është e vetmja. Volkswagen ka shqyrtuar prodhimin e pjesëve për sistemin izraelit Iron Dome, Mercedes-Benz është shprehur e gatshme të hyjë në prodhimin ushtarak në Evropë, ndërsa Ford po diskuton projekte mbrojtjeje me qeverinë amerikane.
Urgjenca është shtuar pas përdorimit masiv të raketave amerikane në konfliktet e fundit. Sipas vlerësimeve të qarkulluara në Pentagon, SHBA-të kanë konsumuar një pjesë të konsiderueshme të rezervave të raketave Tomahawk, Patriot dhe THAAD, duke ngritur shqetësime për aftësinë e vendit për të zëvendësuar shpejt këto arsenale.
Për këtë arsye, administrata Trump ka aktivizuar Defense Production Act, një ligj që i lejon qeverisë të koordinojë kompanitë private për të rritur prodhimin ushtarak, për të përshpejtuar certifikimin e furnitorëve dhe për të shmangur bllokimet në zinxhirin e furnizimit.
Ekspertët theksojnë se SHBA-të po rikthejnë një model të ngjashëm me atë të Luftës së Dytë Botërore, kur fabrikat e automobilëve u shndërruan në prodhuese tankesh, avionësh dhe pajisjesh ushtarake. Edhe pse sot nuk flitet për një ekonomi lufte, kufiri mes industrisë civile dhe asaj ushtarake po bëhet gjithnjë e më i vogël.
