Nga Bufon tek shpirti i skuadrës, 5 arsyet e rizgjimit bardhezinjve
Rëndësia e një fitoreje varet nga rëndësia e kundërshtarit dhe dje në mbrëmje Juventusi ka mundur skuadrën më në formë të kampionateve kryesore të Europës. E ka bërë këtë mes vështirësive dhe me përmbysje dhe, mbi të gjitha, e ka bërë në transfertë në një fushë të vështirë si ajo e Manchester City-t. “Citizens” kryesojnë Premier League pas pesë fitoreve në pesë javët e para të kampionatit, ndërsa Juventusi, në të kundërt, vinte nga 1 barazim dhe dy humbje në tri javët e para. Ekipi i Allegrit është zgjuar në momentin e duhur dhe këto janë pesë e arsyet kryesore pse ka ndodhur kjo:
Morata dhe Mandzukic
Në disavantazh në fillimin e pjesës së dytë pasi ka pësuar një gol të parregullt, Juventusi mund të ndiqte spiralen negative të këtij fillim sezoni. Përkundrazi, shenjat e mira të para në fillimin e takimit nuk kanë qenë të rastësishme. Lajmi më i bukur është se përmbysja në “Etihad” ka ardhur falë sulmuesve. Mario Mandzukic ka shënuar një gol nga ato të tijët: nuk do të jetë kurrë Tevez, por nëse shërbehet në mënyrën e duhur do të shënojë me rregullsi. Alvaro Morata ka treguar se jep diçka më shumë në ndeshjet europiane: goli i gjashtë në Champions me fanellën bardhezi, i katërti radhazi, ka qenë një kryevepër. Suksesi i Juves në këtë sezon do të varet nga talenti i tij i mrekullueshëm.
Allegri
Është akoma herët për ta thënë. Por përshtypja është se skema 4-3-3 e përdorur nga Allegri mund të jetë zgjidhja përfundimtare, në mungesë të një fantazisti me lojtarë krahu cilësorë si Cuadrado, Morata dhe Dybala që mund të ndryshojnë ritmin e ndeshjes në çdo moment. Zgjedhja e guximshme e trajnerit livornez ka qenë një nga arsyet e fitore. Fakti se e ka provuar këtë skemë sulmuese për herë të parë në sezon në shtëpinë e City-it tregon se Allegri, të cilit i kanë ndryshuar pothuajse gjithë ekipin, ka nerva të forta dhe di si të nxjerrë maksimumin nga lojtarët e tij.
Buffon
Gigi Buffon vazhdon ta shtyjë daljen e tij nga skena. Por kjo nuk vjen nga kokëfortësia e lojtarit. Paraqitjet e tij janë të një niveli të lartë. Gigi është një makinë lufte: i bën mirë gjërat e lehta dhe akoma më mrië ato të vështirat. Pas pritjes së dyfishtë kundër Chievos, kur rezultati ka qenë 0-1,është përsëritur dje kundër Sterling dhe Silva që vlen po aq sa dy golat e bardhezinjve. Nëse pret në këtë mënyrë ëndrra për të luajtur në botëror me Italinë në 2018-ën nuk është një utopi.
Pogba
Fanella numër 10, refreni se vlen 100 milionë euro dhe veshja e detyruar e kostumit të liderit në moshën 22 vjeç nuk duhet t’ia kenë lehtësuar punët francezit. Fillimi i sezonit ka qenë i komplikuar për mesfushorin. Një nga mënyrat për të zbuluar nëse një lojtar është një kampion është të shohësh se si reagon kur rritet presioni. Nuk është një rastësi që ai dhe Morata janë kthyer të japin maksimumin në Manchester: pasimi i francezit për Mandzukic është një lëvizje që shumë pak lojtarë mund ta bëjnë. Pas mbrëmjes së djeshme Pogba është më i lehtësuar: sezoni i tij mund të fillojë tani.
Shpirti i skuadrës
Me largimin e Pirlos, Tevez dhe Vidal, Juventusi nuk ka humbur vetëm tre kampionë. Është privuar nga tre lojtarë që, pasi të kishin pësuar një gol nga Chievo pas 4 minutash lojë, do të kishin kërkuar reagim të menjëhershëm nga shokët e skuadrës. “Dakord, kanë bërë gol. Tani shkojmë t’i shënojmë tre”. Pika referimi, udhëheqës. Megjithatë dje në mbrëmje, Juventusi, kur rezultati ishte 1-0, nuk është shpërbërë. Karakteri ka qenë ai i katër viteve të fundit. Dhe tani lojtarët po fillojnë të njihen, sezoni 2015-16 mund të ndryshojë me të vërtetë./Telesport.al
