Pas zgjedhjeve të 11 majit, Kuvendi do të rifillojë punimet nesër, ndërsa Partia Socialiste pritet të mbledhë grupin parlamentar në orën 11:30, përpara seancës plenare. Ftesa u është dërguar deputetëve nga kryetari i grupit, Niko Peleshi, i cili thekson rëndësinë e pjesëmarrjes.
“Në orën 11:30 do të zhvillojmë mbledhjen e Grupit Parlamentar në sallën e seancave plenare, ku do të diskutojmë për vijimin e punës në komisione dhe në seancat e ardhshme. Pjesëmarrja është e domosdoshme,” thuhet në mesazhin e Peleshit.
Ndërkohë, edhe Partia Demokratike do të jetë e pranishme në seancë. Kryetari i grupit parlamentar, Gazment Bardhi, u ka bërë thirrje deputetëve të PD-së që të marrin pjesë aktivisht, duke paralajmëruar se do të fokusohen në denoncimin e “farsës elektorale” të 11 majit.
“Seanca plenare zhvillohet nesër në orën 12:00. Do të jemi aty për të paraqitur faktet mbi farsën elektorale,” ka deklaruar Bardhi.
Po ashtu, në orën 10:00 do të mblidhet Konferenca e Kryetarëve për të miratuar kalendarin trejavor të punimeve parlamentare. Seanca e nesërme pritet të jetë formale, me miratimin e kalendarit, por ajo shihet edhe si një “ngrohje” për aksionin e paralajmëruar të opozitës brenda institucioneve. Seanca e fundit e kësaj legjislature është parashikuar të zhvillohet më 8 korrik.
Nesër Kuvendi mblidhet për herë të parë pas zgjedhjeve, zbulohen porositë e Peleshit dhe Bardhit për grupet parlamentare
