Nëse Albin Kurti ka fituar nga kjo Marrëveshje, atëherë pse nuk e firmosi atë?

Nga Mero Baze

Në Ohër nuk ka marrëveshja mes palëve, por një axhendë perëndimore që detyron palët ta zbatojnë atë ose të përballen me sanksione. Të gjitha lojërat e tjera të fjalëve, nga Albin Kurti dhe Aleksandër Vuçiq, janë përpjekje për të gënjyer popujt e tyre, për gënjeshtrat me të cilat kanë ardhur dhe qëndrojnë në pushtet.
Fakti që të dy udhëheqësit politik, ai i Kosovës dhe Serbisë, nuk guxojnë të nënshkruajnë planin evropian, tregon se ata duan të fitojnë kohë për të vazhduar gënjeshtrat e tyre, me shpresë se dikush do humbasë rrugës.
Për këtë arsye plani perëndimor parashikon fillimin e menjehrshëm të zbatimit të planit, që do të thotë se Kosova duhet të fillojë urgjent krijimin e asosacionit, e cila ka ndryshuar tre herë emër, por jo përmbajte. Tani quhet vetë menaxhim. Në fund ka për tu quajtur ashtu siç ka qenë dikur në kohë të Titos, “vetadministrim”.
Argumentet populiste të Albin Kurtit shpërndarë përmes militantvve të tij, se “po qe se ai do ta kishte pranuar asosacionin, Vuçiqi do firmoste”, janë banale. Vuçiq e ka shpjeguar pse nuk ka firmosur. Ai nuk dëshiron të nënshkruajë një marrëveshje juridike me Kosovën palë, pra ka pengesë atë që në fakt është njohje finale.
Nëse e kthen në të kundërt pyetjen, atëherë do të pyesim: -Nëse Albin Kurti ka fituar nga kjo marrëveshje, nëse Vuçiq ka pranuar de facto Kosovën, nëse ai nuk e ka formuar asosacionin dhe nëse ai i ka plotësuar ëndrrat e tij për reciprocitet, atëherë pse ai nuk firmosi?
Nuk firmosi, pasi asnjë nga gënjeshtrat e tij nuk është në plan. Në plan është një ofert serioze perëndimore, e cila realisht i bën mirë Kosovës dhe e çon përpara axhendën e saj shtetformuese, por i bën dëm një politikani që gjithë karrierën e tij politike e ka ndërtuar mbi një fabulë të ndryshme nga kjo me të cilën po përballet.
Por nuk ja vlen të humbasim kohë me gënjeshtrat e Albin Kurtit pas çdo përballje të tij me dështimet e tij.
Gjëja më e mirë që ka plani perëndimor për Kosovën është axhenda, kalendari i akteve që duhet të realizojë Kosova dhe Serbia. Ato po përcaktohen me afate konkrete, dhe përmbajte konkrete. Ato nuk duan negociata, duan vetëm nënshkrime.
Nëse Kosova e përmbush axhendën perëndimore për Kosovën, ajo e kalon provimin. Nëse jo, as SHBA e as BE nuk ka kohë dhe nerva të merret me tekat e një politikani, i cili ka më të rëndësishme broçkullat e tij populiste se axhendën perëndimore të Kosovës.
Kosova dhe Serbia thjesht do braktisen dhe izolohen. Por ndërsa Serbia është mësuar me izolim dhe sanksione dhe mbijeton, pasi nuk është një komb që e ka të lidhur të ardhmen deomos me perëndimin, Kosova, thjesht vdes dhe rikthehet në pikën zero, pa mbështetjen e Perëndimit. Falë Albin Kurtit!