Në studion e emisionit “Trialog”, të moderuar nga gazetarja Alba Alishani, analisti Lorenc Vangjeli e cilësoi si paradoksal dhe deri në kufijtë e absurdit debatin mbi kërkesën e SPAK për heqjen e imunitetit të Zv.kryeministres.
Sipas tij, vetë vendimi i Këshillit të Mandateve për të mos dalë me një vendim të qartë është tregues i kontradiktës dhe i mungesës së koherencës institucionale.
“Vetë vendimi i marrë, për të mos dalë me një vendim nga Këshilli i Mandateve, është i tillë. Këtu dallohet paradoksi, kërcitja dhe një kapërcim,” – u shpreh Vangjeli.
Ai theksoi se Këshilli i Mandateve ka për detyrë t’i rekomandojë Kuvendit vendimmarrjen e tij, duke garantuar transparencën e procesit, ekuilibrin mes pavarësisë së deputetit dhe zbatimit të ligjit, si dhe shmangien e përdorimit politik të ndjekjes penale.
“Vetë Këshilli e ka për detyrë të rekomandojë Kuvendit vendimmarrjen e tij, duke garantuar se procesi do të jetë transparent, të sigurojë ekuilibrin mes pavarësisë së deputetit që i kërkohet heqja e imunitetit dhe fillimi i ndjekjes penale, si dhe sundimin e ligjit, duke shmangur përdorimin politik të ndjekjes penale,” – tha Vangjeli.
Vangjeli shtoi se këto janë kushtet që duhej të garantonin një proces të rregullt, por sipas tij asnjë prej tyre nuk u respektua.
“Këto janë kushtet që të vazhdojë procesi në mënyrë të rregullt. Por asnjëra nga këto nuk u bë, dhe këtu është paradoksi,” – përfundoi Vangjeli.
