Presidenti i SHBA-së, Donald Trump, ka deklaruar se nuk ndjen asnjë presion në negociatat me Iranin, duke theksuar se ai ka kohë të mjaftueshme, por Teherani jo.
Në një postim në Truth Social, Trump shkroi: Kam gjithë kohën e botës, por jo Irani. Ora po troket.
Ai shtoi se një marrëveshje do të arrihet vetëm kur të jetë “e përshtatshme dhe e mirë për Shtetet e Bashkuara të Amerikës, aleatët tanë dhe, në fakt, për pjesën tjetër të botës”.
Deklarata vjen në mes të spekulimeve se Uashingtoni mund të jetë nën presion për të arritur një marrëveshje të shpejtë me Iranin, për të shmangur kostot në rritje.
Trump kundërshton këtë, duke thënë se ai është “ndoshta personi më pak i presionuar që ka qenë ndonjëherë në këtë pozicion”.
Ndërkaq, më herët Trump e cilësoi situatën në Iran si përçarje të brendshme, që sipas tij e kanë penguar vendin të japë një përgjigje ndaj propozimit të fundit për një marrëveshje armëpushimi mes dy vendeve.
“Irani e ka shumë të vështirë të kuptojë kush është udhëheqësi i tyre! Ata thjesht nuk e dinë!” shkruan Trump në Truth Social.
Udhëheqësi i ri Suprem i Iranit, Mojtaba Khamenei, nuk është parë publikisht qëkur u emërua, me raporte që thonë se ai u plagos rëndë në sulmin që vrau babain e tij.
Megjithatë, udhëheqja e ashpër e Korpusit të Gardës Revolucionare Islamike (IRGC) thuhet se po merr vendimet në Teheran, ndërsa kryetari i parlamentit Mohammad Bagher Ghalibaf dhe ministri i Jashtëm Abbas Araghchi, të cilëve u është ngarkuar të negociojnë me SHBA-në, thuhet se janë më të gatshëm për një marrëveshje.
