Ministri i Jashtëm, Ditmir Bushati priti në një takim homologun e Luksemburgut, Asselborn.
Pas takimit, dy ministrat zhvilluan një konferencë për shtyp, ku folën për çështjen e integrimit të Shqipërisë.
Gjatë fjalës së tij, ministri i Luksemburgut foli edhe mbi çështjet kryesore në rajon, ndërsa tha se 2018-a mund të jetë viti për çeljen e negociatave, megjithatë vuri theksin e rëndësisë te politikat e çështjeve të brendshme.
Asselborn ritheksoi problematikën për numrin e lartë të azilkërkuesve, ndërsa pranoi përpjekjet e shtetit shqiptar për ndalimin e këtij fenomeni.
FJALA E ASSELBORN:
Është kënaqësi që vij në Shqipëri, mendoj se jemi në rrugën e drejtë. Asgjë nuk është e lehtë në Evropë, në BE kemi pasur mundësi të diskutojmë çdo ditë. Nuk mund të them asgjë për Spanjën, por është e rëndësishme që t‘i japim fund dhunës, duhet të gjendet dialog për çështjen e Spanjës. Ne nuk kemi asnjë kompetencë nga BE për të ndërhyrë. Për sa i përket Brexit, mendoj se kemi nevojë për më shumë gatishmëri politike. Më 13 mars 2018 Mbretëria e Bashkuar nuk do të jetë më anëtare e BE, negociatat do të mbyllen brenda dy vitesh. Do të na duhet të dimë se sa anëtarë do të ketë Bashkimi Evropian.
Në Gjermani u mbajtën zgjedhjet, partia nacionaliste e krahut të djathtë mori më shumë se 12% të votave, është tashmë e përfaqësuar në parlament dhe do të ketë një lloj “lufte” në parlament.
Në 2009 u bë kërkesa, u pranua në 2014, ndërsa 2018 mund të jetë një vit i mirë për Shqipërinë, në 2018 mund të çelim negociatat, megjithatë kjo është edhe çështje e politikave të brendshme.
Turizmi – të gjithë e dinë që ju keni një vend të mrekullueshëm, jeni legjendarë me mikpritjen që keni, mbase duhet të investoni më shumë për ta promovuar.
Migracioni- në Luksemburg fluksi i azilkërkuesve është problematik, por edhe në vendet e tjera të BE. Synimi nuk është që të promovohen kërkesat për azil, e di që keni bërë shumë përpjekje.
Të miturit dërgohen në vendin e Ballkanit perëndimor pa prindërit, duhet të mos e lejojmë më një gjë të tillë.
Kandidatura për BE nuk është vendim që i takon vetëm Brukselit, është shumë mirë që keni gjetur një marrëveshje për reformën në drejtësi. /b.d
