Deputeti i PS, Ervin Bushati tha se marrja e rekomandimit për hapjen e negociatave është një lajm i mirë për të gjithë shqiptarët. I ftuar në studion e lajmeve të Ora News, Bushati tha se politika ka bërë detyrën në këto vite, duke theksuar se qytetarët shqiptarë e kanë merituar këtë çertifikim.
Bushati: Është një arritje e qytetarëve shqiptarë, patjetër edhe politika në këto vite ka bërë detyrën e saj, por duhet të pranojmë që shoqëria është më përpara se politika. Qytetarët shqiptarë e kanë merituar me kohë këtë çertifikim dhe sot është një ditë e gëzuar për të gjithë bashkë.
Ai tha se reforma në drejësi ishte shtylla kryesore për hapjen e negociatave.
Bushati: Në dy vitet e fundit është avancuar dhe në pikat kryesore ku tregon edhe raportimi i Komisionit Europian. Reforma në drejtësi ka qenë një nga shtyllat kryesore të gjithë punës sonë në këto 2-3 vite dhe frytet e saj sot ndihen nga gjithë shqiptarët, por mirëpriten edhe nga partnerët tanë në BE. Nuk ka qenë e thjeshtë të vendosësh sundimin e ligjit në Shqipëri ashtu sic kuptohet në termat perëndimore dhe grupet e interesit, situata e padrejtësisë e instaluar në Shqipëri prej dekadash e ka bërë edhe më të vështirë këtë ndërmarrje të madhe që me të drejtë mund të quhet historike.
a.ç
