Ka përfunduar takimi treditor midis ministrit të Jashtëm Ditmir Bushati dhe homologut të tij grek, Nikos Kotzias. Takimi u zhvillua në një hotel të vogël në qytetin juglindor të Korçës.
Delegacioni grek është nisur drejt pikës kufitare të Kapshticës në drejtim të Athinës.
Takimi nisi të premten e shkuar në orën 15:00 për të përfunduar mesditën e sotme.
Në përfundim të takimit, Ministria e Jashtme e Shqipërisë dhe ajo e Greqisë publikuan një njoftim ku thuhet se “të dyja ekipet bënë përparim thelbësor drejt arritjes së zgjidhjeve të qëndrueshme dhe afatgjata për çështjet e pazgjidhura”.
Njoftimi i Ministrisë së Jashtme:
Ministrat e Punëve të Jashtme të Shqipërisë dhe Greqisë, Ditmir Bushati dhe Nikos Kotzias, zhvilluan bisedime në Korçë më 19-21 janar 2018, duke u fokusuar në çështjet bilaterale.
Në vijim të takimit që u zhvillua në Kretë nëntorin e kaluar, të dyja ekipet bënë përparim thelbësor drejt arritjes së zgjidhjeve të qëndrueshme dhe afatgjata për çështjet e pazgjidhura, në përfitim reciprok të të dy vendeve dhe qytetarëve të tyre, në përputhje me vlerat dhe normat evropiane.
Diskutimet u zhvilluan në një atmosferë miqësore dhe konstruktive. Të dyja palët përsëritën angazhimin e tyre për të ndjekur më tej dialogun në të gjitha nivelet në muajt në vijim.
a.ç
