Rivlerësimi i pasurive të paluajtshme, që pritet të nisë nga 1 janari i vitit të ardhshëm, pritet të sjellë një dinamikë të re në tregun e shitblerjeve, pasi shumë prona janë mbajtur pezull në pritje të skemës.
Ndërmjetësuesit thonë se procesi i rivlerësimit jo vetëm që nuk do të frenojë blerjet, por do t’u japë konsumatorëve më shumë mundësi zgjedhjeje dhe ulje kostosh.
“Do të kursejë mesatarisht midis 5 mijë, deri në 15 mijë euro në çdo transaksion. Pra, me shpejtësinë me të cilën do të rriten çmimet, sidomos zona e Tiranës, do të jetë 2.5, 3, deri në 5%. Ndërkohë për bregdetin, mund të ketë ritme më të larta”, u shpreh Reinaldo Pipiria, Kreu i Shoqatës së Ndërmjetësuesve të Pasurive të Patundshme.
Ndërmjetësuesit theksojnë gjithashtu se sektori është i përgatitur për fluksin e madh të aplikimeve, ndërsa ngrejnë pikëpyetje nëse kadastra ka kapacitetet për të përballuar një volum prej 500 mijë pronash që do të përfshihen në rivlerësim.
Nga ana tjetër, ekspertët e ekonomisë e shohin rivlerësimin si proces që ndikon drejtpërdrejt në formalizimin e tregut dhe fuqizimin e financave publike.
“Besoj se buxheti i shtetit është përfituesi më i madh në ato llogaritje që janë bërë. Kjo përkon me fuqizimin e pushtetit vendor dhe nismat që janë marrë tashmë në kadastrën fiskale, të cilat pastrojnë një pjesë të mirë të regjistrave dhe përpiqen të bien çmimet kadastrale me çmimet reale të tregut. Natyrisht që kjo jep një shtytje ekonomisë”, u shpreh Eduart Gjokutaj, ekspert i financave.
Ekspertët theksojnë se rivlerësimi është i dobishëm kryesisht për ata që planifikojnë shitje brenda tre viteve, ndërsa për familjet që nuk kanë plane transaksionesh, procesi nuk është i domosdoshëm.Tv Klan
