Merr jetë një nga politikat kryesore të Bashkisë së Tiranës për reduktimin e ndotjes së kryeqytetit.
Kreu i Bashkisë së Tiranës Erion Veliaj, nga “Pazari i Ri” ka firmosur marrëveshjen me drejtues të disa supermarketeve në Tiranë ku nga data 2 prill qeset plastike do t’u jepen konsumatorëve kundrejt një pagese modeste prej 3-5 lekësh.
Gjatë fjalës së tij, numri një i Tiranës u shpreh se qëllimi i kësaj nisme nuk është për të mërzitur konsumatërët, por për të ndikuar psikologjikisht tek ata që të refuzojnë qeset plastike dhe që të marrin me vete trastën e tyre teksa bëjnë Pazar pasi kjo do të sillte uljen e ndotjes së mjedisit.
“Qeset sjellin një ndotje shumë të madhe. 100 ton qese përdoren në Tiranë. Qeset plastike kundrejt pagesës nuk është për të mërzitur njeri, por që t’i bëhet barrierë psikologjike konsumatorëve që të mos e marrë më qesen plastike.Qëllimi im është ta lë qytetin më të pastër, nga sa e gjeta para 1 viti e gjysmë”, u shpreh Veliaj.
Gjithashtu Veliaj ka sjellë në vëmendje edhe parkingun me pagesë, sipas të cili ajo nuk sjellë një vlerë të madhe në buxhetin e Bashkisë, por është një formë për të bërë një qytet më të pastër.
“Politika e parkimit, nuk sjellë vlerë të madhe në buxhetin e Bashkisë. Ne mund të ndikojmë në uljen e ndotjes së qytetit. Ne mund të lëvizin pa makina. Ka rënë ndotja e ajrit me 15%”, tha Veliaj.
a.ç
