Shtimit i masave të sigurisë në të gjithë territorin italian e në pikat strategjike të vendit, ka bërë që policia italiane në bashkëpunim me Policinë Financiare e Policinë Kufitare të Brindizit të ushtrojnë gjatë orëve të fundit kontrolle të jashtëzakonshme në Portin e Brindisit.
Operacioni i kontrollit “Impakti i Madh i Adriatikut faze 4” që ushtroi kontroll ndaj të gjitha anijeve të mbërritura nga Shqipëria e Greqia, ka çuar në mohimin e hyrjes në territorin italian të 21 shqiptarëve, 1 prej tyre është arrestuar, e 1 person tjetër është denoncuar.
Gjithashtu janë sekuestruar 21 kg cigare kontrabandë, në bordin e një automjeti.
21 shqiptarëve që u është mohuar hyrja në Itali u janë gjetur parregullsi në dokumentacione për të udhëtuar të lirë në zonën Shengen.
Ndërsa ndaj shqiptarit të arrestuar ekzistonte një urdhër arresti i lëshuar nga Prokuroria e Provincës së Arezzos.
Gjatë kontrollit në Portin e Brindizit ishte e pranishme dhe Policia Kufitare gjermane në bazë të një marrëveshjeje të nënshkruar nga Ministritë e Brendshme të dy shteteve.
Policia italiane ka ushtruar një kontroll të imtësishëm ndaj të gjithë pasagjerëve të mbërritur nga Shqipëria e Greqia, ndaj automjeteve të tyre e automjeteve me ngarkesë mallrash.
Janë kontrolluar 4.768 persona, prej të cilëve 2928 janë ekstrakomunitarë si dhe 1.075 automjete.