Më në fund erdhi dhe dita finale. Dita e sotme është vendimtare për anëtarësimin e Kosovës në UNESCO. Në ora 11:30 në Paris, ku po i zhvillon punimet Konferenca e Përgjithshme e UNESCO-s, në rend dite është caktuar votimi për pranimin e Kosovës në këtë organizatë.
UNESCO ka 195 anëtarë,ndërsa për ta siguruar anëtarësimin ne këtë organizatë Kosova duhet të sigurojë 2/3 e votave të anëtarëve të pranishëm në sallë.
Kosova llogarit në 92 vota të Asamblesë së Përgjithshme të UNESCO-s
Qeveria e Kosovës së bashku me partnerët e saj llogarit që 92 vende anëtare të UNESCO-s do të votojnë pro anëtarësimit të Kosovës në këtë organizatë. Pavarësisht kësaj, zyrtarët qeveritarë kanë thënë se pragu prej dy të tretave i votave nga 195 vendet anëtare të UNESCO-s do të jetë vështirë i arritshëm. Qeveritarët disa orë para se të votohet në Asamblenë e Përgjithshme të UNESCO-s, kanë thënë se shpresojnë që Kosova të arrijë numrin e duhur të votave për anëtarësimin në Organizatën e Kombeve të Bashkuara për Edukim, Shkencë dhe Kulturë, shkruan“Koha Ditore”.
Në bazë të një liste të hartuar nga Qeveria dhe partnerët e saj, llogaritet se 62 vende anëtare janë deklaruar se do të votojnë pro. Sipas listës ku është kalkuluar dhe komentuar disponimi i vendeve me të drejtë vote, deri më datën 6 të këtij muaji, si vota të garantuara llogariten 32, përderisa nga shifra totale prej 92 shtetesh në të cilat llogarit Kosova, 30 syresh deri më 6 nëntor nuk e kanë konfirmuar votën pro. Megjithatë, Kosova i ka futur në listën jeshile këto 30 vende
Serbia llogarit në shtyrje të debatit për Kosovën
Një ditë para votimit për ose kundër anëtarësimit të Kosovës në UNESCO, ambasadori i Serbisë në këtë organizatë të Kombeve të Bashkuara, Darko Tanaskoviç ka thënë për agjencinë serbe të lajmeve Beta se ka shanse të mira që debati për pranimin e Kosovës të shtyhet për dy vjet, transmeton Koha.net. Tanaskoviç ka thënë se nëse propozimi i Serbisë merr shumicën e thjeshtë, atëherë nuk do të do të ketë votim për pranimin e Kosovës në UNESCO. Në këtë rast, sipas medieve serbe, pranimi i Kosovës në UNESCO do të shtyhej për dy vjet.
Selimi: Shtyrja – barabartë me mos hyrjen e Kosovës në UNESCO
Kundër spekulimeve dhe pritjeve të Serbisë për shtyrje të vendimit për debat për pranimin e Kosovës në UNESCO, është ngritur zëvendësministri i Punëve të jashtme të Kosovës Petrit Selimi. “Shtyrja e vendimit për Kosovën është sikur edhe ndalimi i hyrjes së Kosovës në UNESCO. Pse të shtyhet? Nuk ka kurrfarë kuptimi të shtyhet diçka që ka përfunduar”, ka thënë Selimi për B92, transmeton Koha.net.
Selimi ka shtuar se UNESCO me statusin vet përkrah paqen në botë përmes bashkëpunimit në shkencë, kulturë,arsim dhe për këtë arsye anëtarësimi i Kosovës do të ishte më i mirë për paqen në Ballkan se sa mos anëtarësimi i saj
