Deputetët në Parlamentin e rajonit të Katalonisë duhej që gjatë ditës të votonin për propozimin e partive separatiste, të cilat kanë shumicën në parlament rreth planit për pavarësi nga Spanja në vitin 2017. Këtë iniciativë qeveria në Madrid e konsideron anti-kushtetuese, e qeveria e Mariano Rajoy ka paralajmëruar se nëse propozimi miratohet, atëherë do të ndërmerren masat ligjore për ta kundërshtuar këtë, raporton TV ARTA.
Fillimi i diskutimit në parlamentin e Katalonisë është parashikuar rreth mesditës. Ndonëse disa degë të Partisë Popullore në pushtet në Spanjë dhe të asaj Socialiste kanë paraqitur ankesat për ta shtyrë këtë votim, Gjykata Kushtetuese në vend të enjten kishte thënë se votimi mund të mbahet.