Një i arratisur për vrasje në listën e “më të kërkuarve” të Ohajos për gati dy dekada u gjet duke punuar si oficer policie në qytetin e tij të lindjes në Meksikë dhe që atëherë është marrë në paraburgim, thanë zyrtarët.
Antonio Riano, i cili ishte në kërkim për vrasjen me armë zjarri të një 25-vjeçari, Benjamin Becarra, në vitin 2004, u arrestua më 1 gusht në Zapotilan Palmas, shteti Oaxaca, Meksikë, ku ai kishte punuar si oficer policie.
Riano, tani 72 vjeç, ishte listuar si një nga “më të kërkuarit” nga Zyra e Sherifit të Butler County dhe u profilua në serinë televizive “America’s Most Wanted” në vitin 2005.
Policia tha se Riano qëlloi Becarra-n jashtë Roundhouse Bar në Hamilton, Ohio, pas një zënke më 19 dhjetor 2004, raporton New York Post.
Riano kishte ndërhyrë për të ndihmuar një banakier në lokal pasi punëtori i kërkoi Becarra-s të largohej nga lokali, sepse ai ishte përfshirë në një sherr atje disa javë më parë, thanë zyrtarët në atë kohë.
Ndërsa Riano dhe Becarra u grindën, banakieri i kërkoi që të dalin jashtë, ku më vonë u dëgjuan të shtënat dhe Becarra u gjet i shtrirë me fytyrë poshtë në trotuar.
Pamjet e kamerave të sigurisë treguan Riano-n duke ikur nga vendi i ngjarjes, megjithatë autoritetet nuk arritën ta gjenin atë. Besohej se në atë kohë ai ishte larguar nga vendi për të shmangur ndjekjen penale.
Paul Newton, shefi i hetimeve për Zyrën e Prokurorit të Butler County, tha se U.S. Marshals fillimisht tentuan ta kapnin Riano-n me një urdhër arresti në vitin 2006 — por ai i shpëtoi duke qenë tek një mik.
Ai tha se ata përfundimisht ishin në gjendje të gjurmonin Rianon në fillim të këtij muaji duke përdorur Facebook dhe media të tjera sociale.
Riano u transportua nga Mexico City në Cincinnati dhe u dërgua në burgun e kontesë Butler, ku ai po mbahet në pritje të procedurave gjyqësore.
Ai po mbahet për dy akuza për vrasje dhe një për sulm të rëndë.
