2001 – Në Beograd, arrestohet ish-presidenti i Serbisë dhe Jugosllavisë Sllobodan Millosheviçi, me akuza se gjatë sundimit të tij dhjetë-vjeçar (1990-2000) ka shpërdoruar pozitën dhe në këtë mënyrë ka marrë një përfitim personal që e ka shfrytëzuar për Partinë Socialiste të Serbisë. Milosheviçin, autoritetet serbe në qershor të të njëjtit vit, ia përcollën Tribunalit Ndërkombëtar për Krime të Luftës në Hagë.
1815 – Ka lindur politikani gjerman Otto von Bismarck, kancelari i parë i Perandorisë së bashkuar gjermane, i njohur si “Kancelari i hekurt”. Kryesoi Kongresin e Berlinit në 1878, ku fuqitë evropiane kanë vendosur një rend të ri të forcave sa i përket marrëdhënieve në juglindje të Europës dhe kanë prishur qëllimin e Rusisë për të krijuar Bullgarinë e Madhe, kurse fqinjët tanë Serbia dhe Mali i Zi kanë fituar njohje ndërkombëtare.
1924 – Një gjykatë gjermane ka dënuar Adolf Hitlerin me pesë vjet burg për tentativën e grushtit të shtetit në nëntor 1923, por në 20 dhjetor është amnistuar. Hitleri sa ishte në burg shkroi librin “Mein Kampf” (Lufta ime), në të cilin ai paraqiti konceptin e “rendit të ri” dhe supremacinë racore të gjermanëve. (b.an)
