Një 26-vjeçar shqiptar i shpallur në kërkim prej 1 viti, është arrestuar në Itali. Kristian Lulaj një vit më parë tentoi të vriste me armë zjarri 27-vjeçarin E.P., në Velipojë.
Falë bashkëpunimit me autoritetet italiane, u bë e mundur lokalizimi dhe kapja e 26-vjeçarit. Tashmë pritet ekstradimi i tij drejt Shqipërisë, teksa vijojnë procedurat me Interpol Roma.
Ngjarja ka ndodhur një vit më parë në fshatin Malikolaj të Velipojës, teksa Gjykata e Shkodrës i caktoi masën “arrest në burg” për vrasje me dashje mbetur në tentativë dhe armëmbajtje pa leje.
Njoftimi i policisë:
Vijojnë operacionet e përbashkëta me partnerët, për kapjen e shtetasve në kërkim ndërkombëtar.
Shkëmbimi i informacioneve me homologët italianë, lokalizon dhe çon në pranga një shtetas shqiptar të shpallur në kërkim ndërkombëtar.
Kapet në Itali dhe arrestohet me qëllim ekstradimin në Shqipëri, një 26-vjeçar, i cili 1 vit më parë, tentoi të vriste me armë zjarri, një shtetas, në Velipojë.
Në vijim të bashkëpunimit me homologët italianë, për lokalizimin, kapjen dhe ekstradimin e shtetasve në kërkim ndërkombëtar, bazuar në informacionet e shkëmbyera ndërmjet palëve, u lokalizua në Itali, u kap dhe u arrestua, shtetasi:
- L., 26 vjeç.
Ky shtetas ishte shpallur në kërkim ndërkombëtar pasi Gjykata e Shkallës së Parë e Juridiksionit të Përgjithshëm Shkodër, i ka caktuar masën e sigurisë “Arrest në burg”, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
Ky shtetas akuzohet se në fshatin Malikolaj, Velipojë, ka tentuar të vrasë me armë zjarri, shtetasin E. P., 27 vjeç, për motive të dobëta.
Interpol Tirana dhe Interpol Roma do kryejnë procedurat për ekstradimin e këtij shtetasi, në Shqipëri.
