Një person i shpallur në kërkim ndërkombëtar, është ekstraduar nga Kroacia drejt Shqipërisë.
Nga specialistët e Interpol Tirana është bërë ekstradimi nga Kroacia drejt Shqipërisë, i 29-vjeçarit P. P., banues në Shkodër.
I riu ishte shpallur person në kërkim ndërkombëtar, për kryerjen e veprave penale “Dhënie ndihmë për kalim të paligjshëm të kufirit” dhe “Vjedhja me dhunë”.
Gjykata e Shkodrës, në nëntor të vitit 2018, ka vendosur masën e sigurisë “Arrest me burg”.
I riu akuzohet se jepte ndihmë shtetasve të huaj për të kaluar në mënyrë të paligjshme nga Shqipëria në Malin e Zi, duke pasur si destinacion vendet e Europës Perëndimore.
Shërbimet e Policisë Kufitare Shkodër, në shtator të vitit 2018, kanë konstatuar gjashtë pakistanezë, të cilët synonin të kalonin në Malin e Zi, të ndihmuar nga shtetasi P. P., i cili pasi i kishte afruar në kufi me Malin e Zi u kishte marrë nëpërmjet kanosjes 720 euro, 2 telefona celularë, si dhe gjashtë çanta ku mbanin dokumentet e tyre.
Si rezultat i shkëmbimit të informacionit në kohë me Interpol Tirana dhe Policinë kroate u bë e mundur kapja e tij me qëllim ekstradimin drejt vendit tonë.
/a.r
