Një kryebashkiake është arratisur pasi akuzohet se ka abuzuar me fondet për ndërtimin e shkollave. Lidiane Leite, 25 vjeç, kryebashkiake e qytetit Bom Jardim në Brazil, në fakt nuk jetonte fare aty.
Ajo bënte një jetë luksoze në kryeqytetin e shtetit Maranhao, ndërsa punët në qytet i drejtonte me mesazhe në WhatsApp. Sipas BBC, një urdhër-arresti është lëshuar ndaj saj dhe të dashurit të saj, të cilin e kishte këshilltarin kryesor.
Ajo sapo kishte kapërcyer moshën 20 vjeç, kur i dashuri i saj, Beto Rocha, u ndalua që të kandidonte pasi dyshohej për korrupsion.
Atëherë Leite shpalli kandidaturën dhe fitoi në vitin 2012. Ajo e caktoi të dashurin si këshilltarin kryesor dhe u largua që të jetonte në Sao Luis, 275 kilometra larg.
Avokati i saj thotë se ajo ishte shumë e re dhe pa eksperiencë kur mori detyrën. Leite u nda nga i dashuri në fillim të këtij viti.
Ajo dyshohet se ka abuzuar me një fond prej 4 milionë dollarësh për shkollat e qytetit. Maranhao është një nga shtetet më të varfra në Brazil.
