Në fund të vitit 2015 borxhi publik në raport me Prodhimin e Brendshëm Bruto është në nivelin e 72.2% dhe përbëhet nga borxhi i qeverisë qendore dhe borxhi i pushtetit vendor.
Sipas të dhënave të bëra publike në raportin për buxhetin faktik të vitit 2015, dorëzuar në Parlament, borxhi i qeverisë qendrore në fund të vitit 2015 është 1,042.2 miliard lekë ose 72.1% i PBB-së, ndërkohë borxhi i Pushtetit Vendor vazhdon të jetë në nivele jo të konsiderueshme, 0.9 miliard lekë ose 0.07% i PBB-së.
Gjatë vitit 2015 borxhi i qeverisjes qendore në raport me PBB është rritur me 2.3 pikë përqindjeje dhe të gjithë peshën e rritjes e ka mbajtur borxhi i jashtëm, ndërkohë që borxhi i brendshëm ka pësuar rënie. Rritja e borxhit të jashtëm ka ardhur si rezultat i kushteve të favorshme në tregun e jashtëm dhe si rezultat i përpjekjes së qeverisë për të ulur presionin e huamarrjes së brendshme dhe për t’i dhënë frymëmarrje kreditimit të sektorit privat.
Gjatë vitit 2015 një pjesë e konsiderueshme e rritjes së borxhit i atribuohet likujdimit të detyrimeve të prapambetura dhe efektit të kursit të këmbimit si pasojë e zhvlerësimit të monedhës vendase ndaj monedhave të tjera që kompozojnë portofolin e borxhit të jashtëm.
Në fund të vitit 2015 rreth 51.4% e borxhit shtetëror është e denominuar në monedhë vendase, ndërkohë pjesa tjetër është në monedhë të huaj dhe mbizotëron në rreth 70% monedha euro. Rreth 97.2% e borxhit të brendshëm është e denominuar në monedhë vendase, ndërkohë që borxhi i jashtëm është tërësisht i denominuar në monedhë të huaj.
Gjatë vitit 2015 kosto e borxhit shtetëror që rrjedh nga pagesat e interesave vlerësohet në 38.6 miliardë lekë ose 2.67% e PBB ku 1.9% e PBB janë pagesa për interesat e borxhit të brendshëm dhe 0.78% e PBB interesa për borxhin e jashtëm. Gjatë viteve të fundit pagesat për interesa kanë pasur një trend rënës, i cili ka ardhur kryesisht si rezultat i rënies së normave të interesit në tregun e brendshëm dhe të jashtëm.
ma.me
