Gjykata e Posaçme ka pushuar gjykimin e çështjes në ngarkim të Xhelal Mziut, i denoncuar nga ish-kryebashkiakut të Matit, aktualisht deputet i Partisë Socaliste, Agron Malaj, për shpifje, kjo pasi nuk janë paraqitur në proces pala akuzuese dhe mbrojtja e tij.
Sipas GJKKO, në përfundim të gjykimit, u vendos: Pushimin e gjykimit të kërkesës së regjistruar pranë kësaj gjykate me nr.30/101, datë 05.06.2025 që i përket viktimës akuzuese Agron Malaj, kundër të akuzuarit Xhelal Mziu, akuzuar për veprën penale “Shpifja”, parashikuar nga neni 120 pika 2 e Kodit Penal, për shkak të mosparaqitjes së viktimës akuzuese Agron Malaj dhe mbrojtëses se zgjedhur personalisht prej tij, av.M.Gj, pa shkaqe të arsyeshme.
Padia e Malajt erdhi pas një deklarate të bërë nga Xhelal Mziu një ditë përpara zgjedhjeve parlamentare të 11 majit, ku ky i fundit tha se një automjet po shpërndante para me qëllim blerjen e votave në favor të PS.
