Ditën e djeshme, 34 vjeçari malazez, Vuk Boriloviç qëlloi për vdekje me pushkë gjuetie 10 persona dhe plagosi gjashtë të tjerë, përpara se të vritej nga një bashkëqytetar i tij.
Ende janë të paqarta motivet që çuan 34-vjeçarin të ndërmarrë aktin ekstrem, ndërsa autoritetet kanë bërë thirrje për solidaritet me familjet e viktimave. Trupi i pajetë i autorit të masakrës është dërguar për autopsi, ndërsa nga informacionet paraprake bëhet e ditur se është vrarë nga bashkëqytetari N. K., ndërsa ishte i rrethuar nga policia.
Boriloviç refuzoi të dorëzohej tek autoritetet e zbatimit të ligjit, edhe pse ishte i rrethuar.
Ministria e Punëve të Brendshme, Drejtoria e Policisë dhe Prokuroria e Lartë e Shtetit bënë thirrje për vetëpërmbajtje, duke thënë se detajet se si ndodhi tragjedia e madhe dhe si u vra Boriloviç do t’i shpallin sapo t’i vërtetojnë faktet.
Kronologjia
Sipas të dhënave zyrtare, Boriloviç hyri në banesën e qiramarrësve të tij rreth orës 15:30 dhe vrau njëmbëdhjetë vjeçarin M. në derë, pastaj vëllanë e tij tre vjet më të vogël. Më pas qëlloi nënën e tyre, Natasha Pajović Martinovic përmes dritares.
Pasi i ekzekutoi gruan dhe dy fëmijët e mitur, autori telefonoi kryefamiljarin Miloš Martinović dhe i tha: “Kam vrarë familjen tënde dhe time”, sipas Vijesti.
Në minutat e ardhshme, në një distancë prej 80 metrash nga shtëpia e tij, ai vrau edhe shtatë persona si edhe plagosi 6 të tjerë.
Sulmi zgjati 45 minuta
Autoritetet shpjeguan se pas krimit ne familjen e Martinović, ai hyri në banesën e një fqini tjetër ku vrau dy të moshuar, Danijela dhe Dimitrije Drecun dhe plagosi rëndë nipin e tyre Aleksandar Drecun (32-vjeç).
Në prag të asaj shtëpie ka vrarë edhe djalin e tyre Rajko Drecun (56-vjeç), i cili kishte vrapuar drejt shtëpisë kur ka dëgjuar të shtënat.
Më pas sulmoi të tjerët. Boriloviç vrau edhe fqinjin e tij Milan Mitroviq (37-vjeç), e më pas dajën e tij Goran Gjurishiq (54-vjeç), dhe teksa po zbriste në rrugë qëlloi për vdekje fqinjët Aleksandra (52-vjeçe) dhe Danijela Radunoviq (51-vjeçe).
I armatosur me dy fishekë dhe një pushkë në dorë, ai u kthye në drejtim të shtëpisë së fqinjit të tij IJ dhe i kërkoi të dilte jashtë.
Ai plagosi edhe katër fqinjë të tjerë, Slavica Zviter, Filip Gjurkoviq, Mileva Ramadanoviq dhe Darinka Çelebiq, si dhe polici Ljubisha Maksimoviq, i cili po përpiqej ta neutralizonte. Qendra Klinike e Malit të Zi bëri të ditur mbrëmë se tre nga të plagosurit janë operuar dhe janë vendosur në Repartin e Mjekimit Intensiv.
Autoritetet nuk i zbuluan detajet dhe motivet që e shtynë Boriloviç të kryente aktin brutal. Viktimat e para janë vrarë në orën 15:30.
Shkëmbimi i zjarrit
Policët që shkuan në vendin e ngjarjes pas të shtënave të raportuara nuk kanë mundur t’i afrohen Boriloviç sepse ai ka hapur zjarr ndaj tyre. Ai ka qëlluar edhe në drejtim të ekipit të Ndihmës Mjekësore të Urgjencës, duke i penguar ata të ndihmojnë bashkëqytetarët e plagosur.
Sipas informacioneve nga vendi i ngjarjes, ai ka vrarë xhaxhain e tij teksa po mundohej të arsyetonte me të, duke i thënë “tani do të të shpjegoj se çfarë po bëj”.
Gjatë kohës që policia po shkëmbente zjarr me Boriloviç dhe pasi ai e plagosi njërin prej tyre, Maksimoviç, 34-vjeçari dyshohet se është qëlluar me pistoletë nga një bashkëqytetar i N. K., i cili po ashtu ka tentuar ta bindë që të dorëzohet.
Mbrëmë, pas hetimeve, prokurorja Andrijana Nastiq ka bërë të ditur se Boriloviçin e ka vrarë një bashkëqytetar, por nuk e ka treguar identitetin e tij.
/e.d
