Nga Artur Ajazi
E kandiduar nga Partia Socialiste dhe Edi Rama edhe për një mandat të ri si kryetare e bashkisë Roskovec, zonja Majlinda Bufi,po përmbyll këtë fushatë elektorale me një “mal” me suksese dhe arritje, por edhe me plot premtime që siç thotë ajo “do ti bëj realitet si gjithmonë duke mos zhgënjyer qytetarët e saj”. Pas një 4 vjeçari të mbushur me punë, përpjekje, projekte dhe arritje, zonja Majlinda “beson dhe shpreson në vazhdimësinë, në ecjen përpara, dhe kurrë më kthim mbrapa në të shkuarën e Berishës, dhe atyre që deri dje rrënuan qytetin e saj”.
Zonja Majlinda, cila është e shkuara dhe e sotmja juaj, në PS ?
Rrugëtimi im në PS, nis kur isha studente në Fakultetin e Inxhinierisë së Ndërtimit, fillimisht si një komisionere në një qendër votimi për të vazhduar pa u shkëputur deri sot që flasim, duke qenë gjithmonë aktive. Gjatë këtij rrugëtimi aspak të lehtë, jam përballur me situata jo vetëm të panjohura për atë kohë, por tepër të vështira për sa i përket mendësisë patriarkale të zonës. Më ka ndodhur edhe të rrëzohem kur kam garuar brenda PS, por duke qenë ambicioze, nuk jam dorëzuar, e kam gjetur forcën brenda vetes që ta vazhdoj rrugën për të arritur këtu ku jam sot. Më kujtohet një debat kur garoja për kryetare të këshillit të zonës, për t’ju treguar vështirësitë dhe pengesat që ka pasur ky rrugëtim plot gropa. Në atë kohë dy argumente ishin të papranueshëm nga socialistët “fanatikë”, të cilët e kishin tepër të vështirë të krijonin besim, sidomos për mua që punoja në bashkinë që drejtohej nga një kryetar i djathtë dhe më qesharake, për faktin se ime motër ishte martuar me një djalë, fisi i të cilit kishte bindje të djathta. Debati dhe kundërshtimet ishin kaq të forta, saqë një moment mendova të dorëzohesha, por dikush në atë moment më kapi nga krahu dhe duke më parë në sy, më tha të mos bëja veprime të nxituara. Dhe tregoi që kishte shumë të drejtë, ai moment kaloi pasi unë i binda dhe fitova. Për disa vite me radhë kam drejtuar Partinë Socialiste në Roskovec dhe njëkohësisht kam qenë dhe kryetare e Forumit të Gruas Socialiste në rrethin e Fierit. Në vitet 2005-2013 kur Partia Socialiste ishte në opozitë, aktivizimi dhe drejtimi i saj në një zonë maskiliste e tepër paragjykuese ma vështirësonte akoma më shumë punën time. Gjithçka u bë më e vështirë dhe e ashpër, por ndërkohë mësova të forcohem.
Ju erdhët nga jeta parlamentare dhe po mbyllni mandatin e dytë si Kryetare bashkie në Roskovec?
Në vitin 2013 u listova në PS brenda zonës fituese, por angazhimi im ka vazhduar përtej kësaj. Pas marrjes së mandatit të deputetes, gjëja e parë që bëra për njerëzit, ishte hapja e një zyre për të qenë më afër problemeve dhe shqetësimeve të tyre. Ky komunikim i vazhdueshëm me ta bëri që të fitoja besimin e tyre, i cili vazhdon ende sot. Kjo ka qenë fushatë aktive, gjithëpërfshirëse dhe me një tjetër frymë në Roskovec, pasi atë vit nga një zonë blu, Roskoveci u shndërrua në zonën rozë. Dhe puna vazhdoi deri më 2015 kur garova fort për bashkinë, pasi përballë kisha katër burra kryetarë komunash dhe të bashkisë. Kjo garë bashkoi bashkë të rinjtë, burrat e gratë, të moshuarit, të cilët kërkonin dhe besonin për një tjetër mënyrë drejtimi. E fitova këtë garë dhe që në atë moment, puna ime ambicioze dhe energjike vazhdon me po atë ritëm. Pas tetë vite në drejtim të bashkisë më vjen mirë të përmend disa nga objektivat e realizuar:
- Kemi përmirësuar infrastrukturën rrugore në çdo qendër të banuar, që do të thotë; kemi
asfaltuar rrugët, zgjeruar dhe pajisur me ndriçim trotuaret.
- Shërbimi i pastrimit është përmirësuar, duke grumbulluar dhe trajtuar mbetjet urbane.
Mbulojmë 100% pastrimin e territorit; mbetjet bimore i grumbullojmë të veçuara, duke realizuar kompostimin e tyre për të prodhuar plehun organik; ndajmë kartonin; kemi grumbulluar e mbyllur mbetjet në Marinëz, duke e shndërruar në zonë të gjelbëruar.
- Kemi përmirësuar dukshëm infrastrukturën arsimore. Nga 13 godina arsimore, 8 prej tyre janë rikonstruksionuar dhe plotësuar me terrene sportive të hapura e të mbyllura.
- Është përmirësuar shërbimi i furnizimit me ujë të pijshëm në Roskovec dhe në Strum.
- Është trefishuar buxheti i realizuar nga grumbullimi i të ardhurave, i cili është më i lartë nga transferta që marrim nga qeveria. Realizimi i këtij objektivi është domethënës për bashkinë, pasi këto të ardhura na kanë ndihmuar të realizojmë shumë projekte në territorin tonë.
Jeni kandidate e PS për një mandat tjetër si kryetare e bashkisë. Çfarë do të thotë kjo për ju?
Puna ime ka vazhduar me të njëjta ritme dhe energji, sepse e tillë është natyra ime, ndaj e them me bindje të plotë se edhe mandati tjetër do të jetë i tillë, do të vazhdohet me punën e nisur me po të njëjta ritme, për të përmbushur kërkesat e vendimet e miratuara nga këshilli, për të realizuar projektet e strategjitë e miratuara në çdo fushë.
Cili është premtimi juaj për banorër e Roskovecit për katër vitet e ardhshme?
Vazhdimi i punës dhe përkushtimit tim me të njëjta ritme.
Si e vlerësoni kandidatin e opozitës, përbën rrezik për ju, kur ndërkohë keni mbështetjen maksimale të Roskovecit?
Nuk e njoh kandidatin, por njoh ata që e mbështesin ashtu si e njohin të gjithë qytetarët e Roskovecit.
Së fundmi nga ata që vetëquhen “opozitarë” ka patur edhe sulme ndaj jush, çfarë keni për t’u thënë?
Argumentet e tyre kundërshtuese nuk janë aspak bindëse, sepse ata nuk e kanë besimin e votuesve dhe për më tepër nuk kanë një program konkret, prandaj do të shpifin, do të manipulojnë, duke përdorur çdo mënyrë denigruese. Kjo përpjekje e ulët e tyre, s’më tremb aspak, pasi puna jonë flet qartë dhe mënyra ime e veprimit është të vazhdoj përpara, për të realizuar objektivat e caktuar me shumë kujdes, e me këmbë në tokë, ndërsa për shpifjet kemi zgjedhur rrugën e drejtësisë. Në mandatin përmbyllës i kam dy precedentë, ku dy përfaqësues të opozitës përdorën shpifje, por gjykata më ka dhënë drejtësi, duke i shpallur në të dyja rastet fajtorë personat përkatës. Edhe për rastin në fjalë përsëri i drejtohem gjykatës. Për mua kanë rëndësi qytetarët e Roskovecit dhe realizimi i objektivave për të vazhduar punën e nisur.
A keni një mesazh për votuesit roskovecarë?
Të vazhdojmë punën e nisur për të përmirësuar përditshmërinë tonë në përmbushjen objektivave dhe nevojave të komunitetit.
