Ministri i Mbrojtjes, Pirro Vengu, ka shpjeguar këtë të martë, më 4 nëntor, se si do ndahen paratë që ky dikaster do të marrë, përmes ndryshimeve që janë bërë përmes Aktit Normativ për rishikimin e buxhetit të vitit 2025.
Në një postim në rrjetet sociale, ministri Vengu shkruan: “Akti Normativ i jep Buxhetit të Mbrojtjes 2025 mbështetjen e duhur për të forcuar kapitalin njerëzor dhe gjithë kapacitetet operacionale, për të nisur prodhimin e armatimit, mjeteve dhe pajisjeve ushtarake ‘MADE IN ALBANIA;, si dhe për të financuar projektet në infrastrukturën kritike.”
Sipas ministrit të Financave, Petrit Malaj, i cili shpjegoi një ditë më parë detajet e ndryshimeve gjatë mbledhjes së Komisionit të Ligjeve, në kuadër të rishikimit të tretë të buxhetit të shtetit për këtë vit, Ministria e Mbrojtjes do të përfitojë një rishpërndarje prej rreth 1.9 miliardë lekësh, në mbështetje të Forcave të Armatosura dhe nevojave të tyre operacionale.
Nga kjo shumë, sipas shpjegimeve të ministrit Vengu përmes disa tabelave të publikuara:
–339 milionë lekë do të përdoren për operacione dhe misione jashtë vendit, për rritjen e gatishmërisë operacionale të forcave si dhe për mbështetje të Spitalit Universitar të Traumës;
–619 milionë lekë do të shkojnë për forcimin e kapitalit njerëzor, që përfshin personelin ushtarak dhe civil të sistemit të mbrojtjes;
-ndërsa 56 milionë lekë do të investohen në përmirësimin e infrastrukturës kritike ushtarake.
