Me propozimin e një të pestave të Kuvendit, Grupi i Ekspertëve të Nivelit të Lartë ka bërë edhe projekt-amendamentet kushtetuese të cilat parashikojnë ndryshimet. Lajmi konfirmohet nga vetë ekspertët, të cilët pasditen e sotme kanë publikuar projektligjin e plotë.
Një prej pikave është edhe përbërja e Gjykatës Kushtetuese nga 9 anëtarë, ndërsa Neni 136 shprehet se anëtarët e Gjykatës së Lartë emërohen nga presidenti me propozim të Këshillit të Lartë Gjyqësor. Nga ana tjetër drafti propozon që anëtarët e Gjykatës së Lartë të jenë me mandat 9-vjecar pa të drejtë emërimi.
Këshilli i Lartë Gjyqësor, 11 anëtarë, 5 zgjidhen nga Kuvendi me 3/5 e votave
“Këshilli i Lartë Gjyqësor përbëhet nga 11 anëtarë, gjashtë prej të cilëve zgjidhen nga gjyqtarët e të gjitha niveleve të pushtetit gjyqësor dhe pesë anëtarë zgjidhen nga Kuvendi nga radhët e juristëve jo gjyqtarë.
Anëtarët jo gjyqtarë zgjidhen me tri të pestat e të gjithë anëtarëve të Kuvendit mbi bazën e propozimeve, nga radhët e avokatëve, 1 anëtar, nga radhët e noterëve, 1 anëtar, nga trupa e pedagogëve të drejtësisë, 1 anëtar, nga trupa e pedagogëve jo gjyqtarë ose prokurorë të Shkollës së Magjistraturës, 1 anëtar, dhe nga shoqëria civile, 1 anëtar”- shkruhet në draftin e ekspertëve.
Sipas draftit të propozuar, kryeprokurori Llalla do duhet të lërë detyrën vitin tjetër
Prokurori aktual Adriatik LLalla i zgjedhur në 2013-n, duhet të lërë detyrën brenda 2 muajve pas konstituimit të Këshillit të Lartë të Prokurorisë. Kjo strukturë krijohet brenda 6 muajve nga hyrja në fuqi e këtyre ndryshimeve. E përkthyer ndryshe, 8 muaj pas hyrjes në fuqi të ligjit, Shqipëria do të ketë një kryeprokuror të ri, ndërkohë që mandati i Llallës përfundon në 2018-n.
Mënyra e zgjedhjes së anëtarëve të Gjykatës Kushtetuese
“Gjykata Kushtetuese përbëhet nga 9 anëtarë, tre prej të cilëve emërohen nga Presidenti i Republikës, tre anëtarë emërohen nga Kuvendi dhe tre anëtarë emërohen nga mbledhja e përbashkët e Gjykatës së Lartë dhe e Gjykatës së Lartë Administrative. Anëtarët që emërohen nga Presidenti i Republikës dhe Kuvendi përzgjidhen nga lista e kandidatëve të hartuar nga Këshilli i Emërimeve në Drejtësi. Procedura e përzgjedhjes dhe emërimit të anëtarëve të Gjykatës Kushtetuese garanton standardet e kandidimit të hapur, konkurimit të ndershëm, transparencës dhe përzgjedhjes së kandidatëve më të kualifikuar.
Kryetari i Gjykatës Kushtetuese zgjidhet me votim të fshehtë me shumicën e anëtarëve të Gjykatës Kushtetuese, për një periudhë 3 vjeçare, pa të drejtë rizgjedhjeje”- shkruhet në draft.
Drafti ka marrë në konsideratë opinionin e Komisionit të Venecias sa i përket edhe buxhetit të Kushtetueses, i cili sugjeron ë të jetë i pavarur dhe mbi këtë organ qëndron vetëm Kushtetuta.
Në total bëhet fjalë për 58 nene të Kushtetutës që do të preken.
