Festa e Pavarësisë ishte një ditë krenarie për komunitetin shqiptar në SHBA, teksa të mbledhur bashkë në Times Square, ngritën flamurin kombëtar, shkruan A2 CNN.
Në ceremoninë që i bëri bashkë në mbrëmje, në hollin e bashkisë së qytetit, merrnin pjesë një sërë personalitetesh të shquara nga të gjitha viset dhe të ftuar gjithashtu nga të gjitha trevat. Në këtë organizim, të drejtuar nga Mark Gjonaj, kreu i Këshillit të Diasporës në Amerikë, pjesëmarrësit vlerësuan rolin e komunitetit shqiptar ndër vite.
“Kjo ditë përfaqëson një moment të rëndësishëm, një krenari për mbarë shqiptarët. Ajo na kujton çfarë kanë bërë të parët tanë dhe na bën krenarë për çfarë kemi arritur deri më sot. Ju jeni shembulli më i mirë. Komuniteti shqiptaro-amerikan është prova më e fortë e lidhjeve dypalëshe”, tha Suela Janina, ambasadorja shqiptare në Kombet e Bashkuara.
Nuk mungoi as urimi i ambasadorit shqiptar Ervin Bushati. “Kjo është një ditë e veçantë. Më kujtohet vetja teksa studioja në Çikago në vitin 1997 dhe duhet ta pranoj që sot jetojmë në një realitet më të mirë”, tha ai.
Mark Gjonaj vlerësoi rolin e miqve amerikanë në rrugën e vështirë përgjatë viteve dhe çmoi diasporën për përçimin e vlerave. “Ju jam mirënjohës që kurrë nuk e harruat nga keni ardhur. Edhe pse prej vitesh keni zënë rrënjë në këtë vend, nuk harruat asnjë çast të përçoni vlerat që mbartni tek fëmijët tuaj dhe të gjithë ata me të cilët keni kontakte. Unë jam krenar që në këtë sallë janë edhe disa që kanë sakrifikuar shumë për të mirën e Shqipërisë dhe Kosovës. Ky komunitet vazhdon të japë, deri edhe në sakrificë, për më të mirën e vendit tonë. Vazhdoni atë që bëni. Investoni në identitetin tonë. Nëse harrojmë rrënjët tona, do të bënim padrejtësi ndaj njerëzve tanë”, tha kryetari i Këshillit të Diasporës.
Teksa një sërë personalitetesh ia dhanë fjalën njëri-tjetrit në foltore, në fund, Gjonaj tha se nuk mund të shkëputej nga misioni i përbashkët për një imazh më të mirë të Shqipërisë. “Ka një thënie që thotë se kufijtë ndajnë shtetet, por jo zemrat e shqiptarëve, që rrahin njësoj ngado”.
