Ministri i Mjedisit Lefter Koka ka zhvilluar një isnpektim në plazhin e Durrësit ku gjatë mesditës u kanstatua një ndotje masive nga derdhjet e mbetjeve nga anijet që ankorohen në port.
Sipas ministrit aktualisht po kryhen të gjitha verifikimet e anijeve. Koka deklaroi se deri të hënën pritet zbulimi i përgjegjësve për situatën, ndërkohë paraprakisht sipas tij, dyshohet se ndotja është shkaktuar nga një anije që ndodhet në radë.
Kreu i Ministrisë së Mjedisit paralajmëroi masa të rrepta edhe ndaj isntitucineve të linjës që kanë toleruar abuzuesit, ndërkohë për shmangien e situatave të ngjashme në të ardhmen Koka pritet ti propozojë Këshillit të Ministrave një plan masash.
Sipas të dhënave, përhapja e mbetjeve të hidrokarbureve ka ndotur rreth 2.5 kilometër vijë bregdetare.
Më herët edhe Policia e Shtetit njoftoi nisjen e hetimeve për ngjarjen.
Agasi: Në pritje të analizave për mostrat, ndëshkojmë abuzuesit
“Ne jemi vënë në dijeni nga banorët. Menjëherë me urdhër të minsitrit Koka është ngritur grup i përbashkët në bashkëpunim me Ministrinë e Brendshme dhe Policinë e Durrësit. Inspektorët në terren po marrin mostra për të mësuar se nga vjen kjo ndotje. Kjo është një ngjarje e përsëritur, këtë problem e kemi pasur edhe në bregdetin e jugut. Duhet të zbulojmë çfarë është derdhur nga anijet,. për të gjetur shkakun nga vjen. Do të bëhet ndëshkimi si me masë administrative dhe me ndjekje penale në proces gjyqësor të subjektit që ka bërë shkeljen. Sipas ligjit, masa administrative që merret në këtë rast është me qindra miliona lekë. Por në fillim do të verifikojmë llojin e ndotjes dhe cili është shkaktari”, deklaroi Ergys Agasi, kreu i Inspektoratit Shtetëror të Mjedisit.
