Një zënkë banale për një shumë prej vetëm 30 eurosh dyshohet se ka qenë shkaku i vrasjes barbare të Michelangelo Scamarcia-s, 68-vjeçarit trupi i të cilit u gjet i dekompozuar brenda një dyqani në lagjen Carbonara të Barit. Policia italiane ka vënë në pranga autorin e dyshuar, një shtetas kinez 42-vjeçar, i identifikuar si Wei Lin.
Sipas rindërtimit hetimor të Karabinierëve, ngjarja ka zanafillën te një marrëveshje mes viktimës dhe pronarit të dyqanit “Moda Casa”. Viktima kishte rënë dakord me Lin që të kryente një transaksion fiktiv prej 600 eurosh përmes terminalit POS të dyqanit, duke përdorur “Kartën e Përfshirjes” (një formë asistence sociale që nuk lejon tërheqjen e parave cash).
Në këmbim, 42-vjeçari duhej t’i kthehej 530 euro në dorë, duke mbajtur 70 euro si komision për shërbimin. Konflikti nisi kur Lin i dorëzoi Scamarcia-s vetëm 500 euro. Diferenca prej 30 eurosh ndezi një debat që agravoi deri në mbytjen e të moshuarit.
Zbulimi i tmerrshëm në magazine
Trupi i Michelangelo Scamarcia-s u gjet në mëngjes pas javësh kërkimesh, i fshehur brenda disa çantave në një dhomë të vogël magazinimi.
Hetuesit u alarmuan nga një erë e rëndë dekompozimi dhe një lëng që rridhte poshtë derës së magazinës.
Hetimet kanë zbuluar se autori nuk u mjaftua me krimin, por tentoi të përfitonte më tej nga vdekja e 68-vjeçarit. Më 27 dhe 28 prill, Lin ishte parë në zyrat postare duke tentuar të tërhiqte para me kartat e viktimës, por dështoi pasi nuk dispononte kodin e saktë PIN. Interesant është fakti se 42-vjeçari ishte marrë në pyetje si person që kishte dijeni për ngjarjen dy herë gjatë muajit prill, por kishte mohuar çdo përfshirje deri në momentin e gjetjes së kufomës.
“Prokurori Claudio Pinto pritet të kërkojë vlerësimin e arrestit dhe ka urdhëruar kryerjen e autopsisë për të përcaktuar me saktësi kohën dhe shkakun e vdekjes,” bëjnë me dije mediat vendase.
