Deputeti Eduart Ndocaj tha në kuvend se emigrantët janë qytetarë shqiptarë të regjistruar dhe nuk ka nevojë për një regjistrim tjetër. Ndocaj denoncoi edhe faktin se në zgjedhjet e 23 qershorit kanë marrë pjesë emigrantë që nuk kanë qenë në Shqipëri.
“Ne jemi qytetarë shqiptarë, jo emigrantë. Ju na trajtoni si emigrantë. Kemi 25 vjet që kërkojmë të votojmë atje ku jetojmë. Ku të regjistrohemi ne? Unë jam regjistruar në Shqipëri, edhe fëmijët e mi. Kryeministri na premtoi se do votonim në zgjedhjet lokale. Shqiptarët kanë votuar tash 20 vjet edhe pse nuk kanë qenë në Shqipëri. Në zgjedhjet e 23 qershorit kam pa emra që nuk ishin këtu dhe kanë votuar. Ministri i Brendshëm i ka të gjitha regjistrimet e shqiptarëve në Itali”, tha ai.
Më tej, deputeti Ndocaj si një ish-emigrant tha se konsullata shqiptare në Milano nuk të jep informacion pa paguar 10 euro.
“Do na privoni shërbimet e konsullatës së Milanos që nuk të jep asnjë informacion pa i dhënë 10 euro? E kam denoncuar publikisht. Asnjë masë nuk është marrë për atë zonjë. Me plot sekserë jashtë. Cilat shërbime do na hiqni, ne nuk kemi pasur asnjë shërbim nga kjo sallë. Na keni tradhtuar që kur kemi dalë jashtë shtetit. Shërbimet e kujt do të na hiqni? Unë mendoj që nuk është e vështirë që të votojnë qytetarët shqiptarë. Duhet t’u jepet mundësia. Jam i bindur se 50% e deputetëve që janë këtu nuk kanë për të patur asnjë shans të hyjnë sepse emigrantët nuk shiten për një thes miell. Deputetë pa program, pa vizion”, deklaroi ai.
Më pas drejtuesja e seancës i ka shkëputur mikrofonin Ndocajt, pasi i kishte përfunduar koha. Por deputeti Gent Strazimiri që ishte planifikuar të fliste pas tij, ka kërkuar që koha e tij t’i kalojë Ndocajt.
Pas shumë zërave nga salla, Ndocaj ka rimarrë fjalën duke denoncuar këtë radhë kërcënimet në adresë të tij nga eksponentë të PS. Ndocaj tha se parlamenti duhet të marrë masa ndaj këtyre kërcënimeve.
“Jam edhe deputet i grupit parlamentar të PS dhe për shkaqet që kam ngrit se në qarkun e Lezhës ka probleme të mëdha sociale, mendoj se duke i ngritur këto probleme jam edhe kërcënuar nga individë të PS-së. Këtu nuk është as përmend se një deputet i PS-së është kërcënuar nga individë të PS-së. Ndaj kërkoj të merren masa dhe të mos e lini në harresë siç e keni lënë tash një javë”, deklaroi Ndocaj.
