Federata Shqiptare e Futbollit ka vendosur që një sasi e caktuar biletash për ndeshjen Shqipëri-Itali të shitet edhe në qytetin e Shkodrës, ku luhet ky takim i eliminatoreve të Botërorit 2018. Ashtu siç pritej, që me hapjen e biletarisë, ka pasur radhë të gjata për të blerë një biletë për duelin ku në fushën e “Loro Boriçit” do të zbresin disa nga yjet e kampionatit italian.
Sipas “shkodrasport”, ka pasur radhë të gjata që në momentin kur biletaria është hapur për herë të parë në orën 17:00 të ditës së sotme. Në shitje janë vetëm biletat e tribunave pas porte, ato që kushtojnë 1000 dhe 1500 lekë, por interesimi i tifozëve shkodranë ka qenë i lartë, duke pasur parasysh se në ndeshjen e mëparshme kundër Spanjës, për ta nuk doli në shitje asnjë biletë.
