Një infermier i ri në Britani ka ndërruar jetë pasi po trajtonte pacientët e infektuar me koronavirus. 23-vjeçari John Alagos u sëmur në punë, por nuk u lejua që të shkonte në shtëpi pasi pavijoni i tij kishte pak persona në shërbim, deklaroi nëna e tij e trishtuar.
Besohet se punonjësi i ri i shëndetësisë u infektua me Covid-19 dhe ndërroi jetë në shtëpi pasi përfundoi turnin 12 orësh, por nuk është konfirmuar nga burime zyrtare. Nëna e tij, Gina Gustilo, 50 vjeçe ka zbuluar detaje shokuese nga ngjarja tragjike.
E kontaktuar nga “Mail Online”, ajo tregoi se i biri nuk vuante nga sëmundje shoqëruese, por u infektua se nuk ishte pajisur me veshje mbrojtëse në punë. Pasi përfundoi turnin të premten, u kthye në shtëpi duke u ankuar se kishte kaluar gjithë natën me dhimbje koke dhe temperaturë të lartë.
Me lot në sy, Gustilo tha: “Unë e pyeta se pse nuk erdhi në shtëpi dhe ai tha se kishte pyetur personelin tjetër, por ata nuk e lanë të shkonte se ishin pak persona në shërbim. Unë i thashë të merrte pak paracetamol. Pas disa minutash, e gjeta në krevat teksa ngjyra e lëkurës po i bëhej blu”.
Pasi e gjeti djalin pa ndjenja, Gustilo telefonoi menjëherë urgjencën, por ishte e pamundur që të rikthehej në jetë.
John Alagos trajtonte pacientët me koronavirus në Spitalin e Përgjithshëm Watford, i cili mbrëmë deklaroi për një “incident të rëndësishëm” dhe mbylli departamentin e tij A&E pas një problemi me pajisjet që furnizojnë me oksigjen.
Spitali i Përgjithshëm Ëatford bëri një deklaratë pas ngjarjes: “Stafi ynë është informuar plotësisht për simptomat e Covid-19 dhe ne kurrë nuk do të prisnim që dikush të qëndronte në punë nëse do të shfaqnin ato simptoma. … Ne e kemi mbajtur gjithmonë stafin tonë të përditësuar me udhëzimet e fundit për t’u siguruar që ata kanë nivelin e duhur të mbrojtjes”.
/a.r
