Seanca e sotme plenare, ishte e planifikuar si maratonë, por në fakt u zhvillua për vetëm 26 minuta, vjen si pasojë e irritimit të Partisë Demokratike ndaj “Diellës”.
Në një komunikim me lidhje të drejtpërdrejtë në Klan News, ishte deputeti demokrat, Belind Këlliçi, i cili foli për atë se çfarë ndodhi në seancën e sotme mes debatesh dhe miratimi i një qeverie të re në kohë rekord.
Këlliçi analizoi shkurtimisht se çfarë ndodhi në mbledhjen e grupit parlamentar të Partisë Demokratike, e cila u bë pas mbarimit të seancës. Deputeti demokrat sqaroi se PD-ja do të përgjigjet ndaj mazhorancës me një strategji plotësisht të re.
“Kemi pasur një mbledhje shumë të gjatë të grupit parlamentar. Do vijojmë të kemi sërish mbledhje edhe një kalendar shumë intensive të mbledhjeve dhe takimeve. Ka pasur propozime nga më të ndryshme. Padiskutim ne do duhet të përgjigjemi me një strategji edhe komunikimi krejt të ndryshme. Edhe organizimi krejt ndryshme, të gjithë këtyre skenarëve dhe kurtheve politike që mund të ngrejë mazhoranca, që më pas mund të transportohet në sytë e qytetarëve shqiptarë sikur janë skenare apo agjenda të opozitës, kur në fakt nuk janë të tilla. Janë krye këput të mazhorancës”, tha Këlliçi.
Kujtojmë se Partia Demokratike është shprehur gjithnjë pro modelit të “mosbindjes” në Kuvend. Mbetet për t’u parë sakaq nëse demokratët do të përdorin si strategji sërish mosbindjen në nivel më të “agravuar”, apo do të ketë realisht ndryshime të qasjes së tyre në Parlament ndaj mazhorancës.
Nga seanca e sotme, përbërja e Këshillit të ri të Ministrave dhe programi qeverisës është votëbesuar me 82 vota pro të shumicës ndërsa demokratët hodhën objekte në drejtim të ministrave dhe kreut të qeverisë. Kjo ishte seanca e tretë brenda javës, pasi parlamenti ka nisur me një agjendë të ngjeshur. Risjellim në vëmendje se me votat e mazhorancës është ndryshuar Rregullorja dhe janë riformatuar komisionet.
